Abdullah Öcalan tərəfdarlarını silahı yerə qoymağa çağıra bilər

Ömürlük həbs cəzasına məhkum olan PKK terror təşkilatının lideri Abdullah Öcalan tərəfdarlarını silahı yerə qoymağa və Türkiyə ilə illərdir davam edən silahlı münaqişəyə son qoymağa çağıra bilər.

Bu barədə "Türkiye" qəzeti yazıb.

Məlumata görə, Öcalanın çağırışı PKK-nın İraqın şimalı və Suriyadakı silahlı döyüşçülərinə, həmçinin Avropadakı tərəfdarlarına ünvanlanacaq. Çağırış ya əl yazısı ilə yazılmış məktub, ya da videomüraciət formasında olacaq.

Bunun Xalqların Bərabərlik və Demokratiya Partiyası (DEM) nümayəndələrinin İmrali adasındakı həbsxanada Öcalanı ikinci və ya üçüncü dəfə ziyarətindən sonra baş verəcəyi ehtimal olunur. Onlar daha əvvəl dekabr ayında Öcalanla görüşüblər.

TGRT telekanalının məlumatına görə, Öcalanın PKK-ya müraciətinin fevralın ortalarına qədər elan edilməsi gözlənilir.