055 213 76 73
2011-ci ildə İsrail beş il girovluqda olan Həmas əsgəri Gilat Şaliti azad etmək üçün 1000-dən çox məhbusu azad etmişdi. Bununla belə, İsrail indi əsas məhbus mübadiləsinə yenidən baxacaq.
BAKU.WS xarici mətbuata istinadən xəbər verir ki, çünki məhbus mübadiləsində azad edilənlərdən biri Yəhya Sinvar Qəzzada HƏMAS-ın lideri olub.
İsrailin öz əlləri ilə azad edilən Yəhya Sinvar “dövlət düşməni” elan edilib. İndi İsrail hər yerdə Sinvarı axtarır.
1962-ci ildə anadan olan Sinvar o vaxt Misirin nəzarəti altında olan Qəzzanın cənubundakı Xan Yunisdə böyüyüb. Bu səbəbdən İsrail onu “Xan Yunisin qəssabı” adlandırır. Sinvarın ailəsi əvvəllər indi İsrailin cənubunda yerləşən Aşkelonda yaşayırdı.
Ailə Aşkelonu itirdikdən sonra Qəzzaya köçmək məcburiyyətində qalıb. Ümumilikdə Sinvar təxminən 24 il həbsdə yatıb. O, ilk dəfə 1982-ci ildə həbs edilib. Sonrakı illərdə o, Salah Şehade ilə əlaqə qurdu və Fələstin hərəkatında İsrail casuslarını hədəf alan bir bölmə yaradıb. 1987-ci ildə Sinvarın qurucularından biri olduğu bölməsi Həmas qurulduqdan sonra təşkilatda iştirak etməyə başlayıb.
1988-ci ildə Sinvar iki İsrail əsgərinin və İsrailə işləməkdə şübhəli bilinən dörd fələstinlinin qətlində iştirak etdiyinə görə həbs edilib. Növbəti il o, dörd ömürlük həbs cəzasına məhkum olunub.
2006-cı ildə HƏMAS-ın hərbi qanadı olan İzzəddin əl-Qəssam Briqadalarından bir komanda qazdıqları tunel vasitəsilə İsrail ərazisinə keçərək ordu postuna hücum edib. Hücumda iki İsrail əsgəri şəhid olub, Gilad Şalit adlı əsgər isə əsir götürülüb. Şalit beş il əsirlikdə qalıb.
O, 2011-ci ildə məhbus mübadiləsi müqaviləsi ilə azad edilib. İsrail Şalitin azad edilməsi üçün 1027 məhbusu azad edib. Onlardan biri Sinvar idi.
Azad edildikdən sonrakı illərdə Sinvar HƏMAS-ın hərbi qanadının sıralarında sürətlə yüksəlib. Sinvar 2015-ci ildə ABŞ-ın beynəlxalq axtarışa verdiyi terrorçular siyahısına salınıb və 2017-ci ildə Qəzzada HƏMAS-ın rəhbəri olub.
Sinvar HƏMAS rəhbərliyində təşkilatın siyasi bürosunun rəhbəri İsmayıl Haniyədən sonra 2-cidir. Sürgündə olan Haniyyə ilə Sinvar Qəzzanın faktiki hökmdarıdır.
Alovlu çıxışları ilə bilinən Sinvar Həmas daxilindəki sərt siyasətləri ilə də tanınır. Bunun ən bariz nümunəsi kimi 2015-ci ildə mənimsəməkdə ittiham olunan Həmas komandiri Mahmud Ştivinin öldürülməsi göstərilir.
İsrail keçən həftəki hücumları planlaşdıranlar arasında Sinvarın da adını çəkir. İsrail Müdafiə Qüvvələrinin sözçüsü polkovnik-leytenant Riçard Hecht şənbə günü jurnalistlərə bildirib:
“Sinvar şərin üzüdür. O, Usamə bin Ladenin 11 Sentyabr hadisəsində olduğu kimi, bunun arxasında duran təşkilatçıdır".
