Xətaidə ağacları kəsib, obyekt tikirlər? - VİDEO - AÇIQLAMA

Bakı şəhəri Xətai rayonu, Yusif Səfərov 12 ünvanında yaşayış binasının qarşısında obyekt tikilir.

Bu barədə həmin ərazidə yaşayan sakinlər şikayət ediblər. Onlar bildiriblər ki, 2017-ci ildə ərazidə şam ağacları kəsilib:

“Kəsilən ağacların yerinə yenidən ağaclar əkib, obyekt tikilməsinin qarşısını ala bildik. Ağaclar bitib, böyüyür, indi yenə gəlib kəsib obyekt tikmək istəyirlər”.

Qeyd edilib ki, artıq əraziyə tikinti materialı tökülüb.

BAKU.WS-in məlumatına görə, Xətai Rayon İcra Hakimiyyətinin ictimai-siyasi və humanitar məsələlər şöbəsinin müdiri Pənah İmanov “oxu.az”ın sorğusuna cavab olaraq bildirib ki, Xətai rayonu, Yusif Səfərov 12 ünvanı İqtisadiyyat Nazirliyi yanında Əmlak Məsələləri Dövlət Xidməti tərəfindən icarəyə verilib:

“Həmin şəxs də ona aid olan ərazini hasara almağa cəhd edib. Sakinlərin narazılığı olduğu üçün bu işlər dayandırıldı və tam nəzarətimizdədir”.