Şahin Diniyev: "Neftçi" qol vəziyyəti yarada bilmirdi"

"Rəqib qol vəziyyəti yarada bilmirdi".

BAKU.WS "report"a istinadən xəbər verir ki, bunu "Səbail"in baş məşqçisi Şahin Diniyev "Neftçi" ilə 1:1 hesablı heç-heçə etdikləri Premyer Liqanın II tur oyunundan sonra mətbuat konfransında deyib.

57 yaşlı mütəxəssis matçın gərgin alındığını bildirib: "Hər iki komanda qalib gələ bilərdi. Qarşılıqlı hücumlar şəraitində keçən oyun oldu. Komandamız yeni qurulur. Adaptasiya üçün vaxt lazımdır. Ötən oyundakı səhvləri bu gün etmədik. Əks-hücumlarda rəqibi yaxalamaq istəyirdik və buna nail olduq. Hesab oyuna görə oldu".

Ardıcıl ikinci turda qapılarına penalti təyin olunmasına toxunan çalışdırıcı təəssüfünü gizlətməyib: "Kənardan baxanda bu oyunda da 11 metrlik cərimə zərbəsi yox idi. Baş hakim VAR-a belə baxmadı. Bizim taleyimiz budur, artıq qəbul etmişik. Çətin də olsa, vuruşacağıq".

O, referinin qərarında şikayət etməyəcəklərini söyləyib: "Nə dəyişəcək? Ötən oyunda da olmuşdu. Onsuz da 2 xal gedib. Kenni Sayef topa açıq ayaqla girmişdi. Bu epizod "Neftçi"də olsaydı, fərqli qərar verilərdi".