"Qalatasaray" "Zenit"in futbolçusunu almaqda israrlıdır

"Zenit" və "Qalatasaray" klubları hazırda konsensusa gəlməkdən uzaq olmasına baxmayaraq, İstanbul təmsilçisi braziliyalı yarımmüdafiəçi Vendelin transferi ilə bağlı danışıqlardan geri çəkilmək niyyətində deyil.

Bu barədə "X" sosial şəbəkəsində jurnalist Rudi Qaletti yazıb.

Onun sözlərinə görə, yaxın günlərdə danışıqlar davam etdiriləcək. Bildirilir ki, “Qalatasaray” futbolçu ilə şəxsi müqaviləni razılaşdırmaqda heç bir problem görmür.

Ötən mövsüm yarımmüdafiəçi bütün yarışlarda 35 matçda iştirak edib, bu matçlarda 4 qol vurub, 10 məhsuldar ötürmə edib. Futbolçunun klubla hazırkı müqaviləsi 2027-ci ilin yayına kimi nəzərdə tutulub.

Nüfuzlu “Transfermarkt” internet portalında verilən məlumata görə, 26 yaşlı futbolçunun bazar dəyəri 20 milyon avrodur.