Vətəndaşlar bu halda banklardan təzminat tələb edə bilər

Dövlətə məxsus "Asan finans" sistemi vasitəsilə banklar vətəndaşların maaş və borcları başda olmaqla bir çox şəxsi məlumatlarını sorğulayırlar.

Bu da tez-tez müzakirələrə və narazılıqlara səbəb olur.

Mütəxəssislər bildirirlər ki, bu platforma biznesmenlərin və vətəndaşların lazım olan informasiyasını əldə etmək üçün yaradılıb. Banklar da bu platforma vasitəsilə müştəridən ərizə istəmədən lazım olan məlumatları yerindəcə əldə etmək imkanı qazanır. Amma "Fərdi məlumatlar haqqında" qanununa əsasən, fiziki və hüquqi şəxslər barədə məlumatları əldə etməzdən əvvəl onlardan razılıq alınmalıdır.

İKT mütəxəssisi Fərhad Əliyev deyib ki, vətəndaşlar fərdi məlumatlarının qorunmasını özləri həyata keçirə bilərlər.

Məsələ ilə bağlı Elektron Təhlükəsizlik Xidmətindən "Xəzər Xəbər"ə bildirildi ki, vətəndaş məlumatlarının qanunsuz sorğulanması ilə bağlı məhkəməyə müraciət edə və bankdan təzminat tələb edə bilər.

Ekspertlər deyirlər ki, vətəndaşların öz hüquqlarını bilmələri üçün "Fərdi məlumatlar haqqında" qanunla tanış olmaları məsələhətdir.