Sağlığında qiymət verin insanlara - Körpələr cəhənnəm əzabı çəkir

Azərbaycanda nadir və ağır genetik xəstəlik olan kistoz – fibrozdan əziyyət çəkən uşaqların sayı, təəssüf ki, ilbəil artır. Çox zaman bu diaqnozu Azərbaycanda hər həkim qoya da bilmir. Çünki lazım olan bahalı genetik analizlər yoxdur, vaxtında uşaq doğulan kimi bu analizlər aparılmır, uşaqlar astma, tənəffüs çatışmazlığı, pnevmoniya, ürək xəstəliklərindən səhv müalicə alır və qısa müddətdə tənəffüs çatışmazlığından ölür.

BAKU.WS xəbər verir ki, mövcud xəstəlikdən əziyyət çəkən uşaqların valideynləri dövlət qurumlarından dəstək almaq məqsədilə müraciət ünvanlayıb.

"Kistoz fibroz" xəstəliyindən əziyyət çəkən anaların üsyan dolu müraciəti belədir:

"Biz bu müraciəti artıq yorğun və ümidsiz bir halda bütün Dövlət orqanlarına, aparatlarına, dövlət və qeyri-dövlət kömək təşkilatlarına, hətta hər bir Azərbaycan vətəndaşına ünvanlayırıq. Dəfələrlə aidiyyətli orqanlara, müxtəlif vəzifəli dövlət adamlarına, sığorta şirkətinə, fondlara vəziyyətimizlə bağlı müraciətlər etməyimizə baxmayaraq, bizə heç bir yerdən əl uzadan olmur.

Xəstəlik barədə qısaca məlumat verək ki, bizim övladlarımız genetik xəstəlik olan "kistoz fibroz" xəstəliyindən əziyyət çəkirlər. Bu xəstəlik daim həkim nəzarətində olmalı və davamlı müəyyən dərman preparatlarını (Ventolin nebules, Kreon 10.000 və 25.000 (xəstələrin ehtiyaclarına görə dəyişir) ursofalk (ursoactive) Dekas plus softgels, liquid (xəstələrin yaşlarına görə dəyişir) naxl 0,9% hipotonik, pulmazyime (Dornaz Alfa, nebulazer cihazi, nəfəs aləti və s.) qəbul etməli olan daimi müalicə tələb edən sistem xəstəliyidir.

Dərmanlar baha olduğu üçün bütün dünya ölkələrində bu xəstəliyin dərmanları xəstə ölkə vətəndaşlarına aylıq həkim təyinatı əsasında pulsuz verilir. Bizdə isə belə bir imkan yoxdur.

Bahalı olması bir yana, bəzi vacib dərmanlar ümumiyyətlə Azərbaycanda yoxdur, gətirilmir. Məsələn: pulmazyme.Övladlarımızın dərmanlarını almaq üçün baş vurduğumuz heç bir sığorta şirkəti genetik xəstəlik olduğu üçün müraciətimizi qəbul etmir.

Ümidimiz yanvar ayında olacaq sağlıq sığortasına idi. Onu da bildirirlər ki, xəstələr xəstəxana vəziyyətinə düşəndən sonra orada yatdığı müddətdə dərmanları dövlət tərəfindən ödəniləcək.

Biz bu sığorta lahiyəsini hazırlayan bütün səhiyyə aparatlarına üzümüzü tutub soruşuruq: "Olmazmı ki, dərmanlar xəstələrə xəstəxanaya düşüləcək vəziyyətə çatmamışdan qabaq verilsin, onlar heç o xəstəxanada yatılacaq vəziyyətə düşməsinlər? Bilirsinizmi ki, bu xəstələrin xəstəxana şəraitində yaşaması belə onların həyatı üçün nə qədər təhlükəlidir?

Bəs belə olduğu halda, bir dövlətin Səhiyyə Nazirliyi bizə hansı köməyi göstərə bilir?

- uşaqlarımızın yaşamağı üçün dərman vermir.- müalicəsi üçün xəstəxana ayırmır. (reabilitasiya mərkəzi) - heç olmasa lazım olan dərmanları öz pulumuzla almağımıza kömək olsun deyə lazımi dərmanları xaricdən idxal etmir.

Bizim budəfəki müraciətimiz xəstə uşaqların analarının adından bütün dövlət qurumlarınadır: Uşaqlarımızı yaşatmaq üçün bizə bir yol göstərin. Bəlkə, bizim bilmədiyimiz, ancaq problemlərimizi həll edəcək, sizin bildiyiniz bir dövlət qurumu var. Həmçinin əlavə olaraq bir ricam var - maraqlanın görün, hazırkı vəziyyətdə mövcud olan orta aylıq əmək haqqı ilə (minumum əmək haqqı alanlar belə var) 1 xəstənin 1 aylıq dərmanlarını təmin etmək mümkündürmü?

SAĞLIĞINDA QİYMƏT VERİN İNSANLARA. Bu uşaqlar bir dövlətin, bir millətin gələcəyidir".

Qalereya