Keçmiş məcburi köçkünləri SEVİNDİRƏCƏK XƏBƏR - Bu ərazilərdə...

Azərbaycanda keçmiş məcburi köçkünlərin yaşayış şəraitinin yaxşılaşdırılması istiqamətində daha bir addım atılır.

BAKU.WS-in əldə etdiyi məlumata görə, Qaçqınların və Məcburi Köçkünlərin İşləri üzrə Dövlət Komitəsinin Mənzil İstismar Departamenti Bakı və Sumqayıt şəhərləri, eləcə də Biləsuvar rayonunda salınmış keçmiş məcburi köçkün qəsəbələrində fərdi yaşayış evlərinin və mənzillərinin təmiri ilə bağlı yeni tender elan edib.

Layihə çərçivəsində qəsəbələrdə bir sıra bərpa və yenidənqurma işlərinin görülməsi nəzərdə tutulur.

Qeyd edək ki, Dövlət Komitəsinin bu addımı keçmiş məcburi köçkün ailələrinin yaşayış şəraitinin daha da yaxşılaşdırılması, uzun illərdir istifadə olunan mənzillərin yenilənməsi və təhlükəsizliyin artırılmasına yönəlib. Təmir işləri başa çatdıqdan sonra qəsəbələrdə daha komfortlu və dayanıqlı yaşayış mühiti yaradılacağı gözlənilir.