Kanalizasiya kollektorunun üzərində tikilən təhlükəli evlər

Xətai rayonu, Əhmədli kəndi, Şahin Səmədov küçəsində təxminən 20 il əvvəl fərdi yaşayış evləri kanalizasiya xətləri üzərində tikilib. Amma deyilənə görə, vətəndaşların bundan xəbəri olmayıb.

Bu yaxınlarda yerdə çökmə baş verib, vətəndaşlar evlərinə girə bilmirlər. Çünki evlər hər an uça bilər.

Sakin yaranan vəziyyəti Baku TV-yə belə izah edib:

"Bu, bir həftə ərzində baş verib, diametri genişlənib. Mənimlə bərabər, bu sırada yaşayan evlərin hamısı belə qəzalı vəziyyətdədir. Bir çox əlaqədar təşkilatlara bildirmişik. Bilsəydik, bu boyda evləri tikərdikmi?".

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, müvafiq qurumlarla birgə akt tərtib olunaraq kollektorun üzərində qeyri-qanuni tikilən fərdi yaşayış evlərinin sakinlərinə təqdim edilib. Onlara həmin evlərdə yaşamağın təhlükəli olduğu izah edilib.