Ermənilərin Alxanlıda yaraladığı qadından XƏBƏR VAR

İyulun 4-də ermənilərin Füzuli rayonunun Alxanlı kəndini atəşə tutması nəticəsində yaralanan 1965-ci il təvəllüdlü Sərvinaz Quliyevanın yerləşdiyi hərbi hospitaldan mülki xəstəxanaya köçürülməsi hələlik təxirə salınıb.

BAKU.WS xəbər verir ki, bu barədə "Trend”ə Füzuli Rayon Mərkəzi Xəstəxanasının baş həkimi Natiq Şükürov deyib.

Onun sözlərinə görə, hazırda S.Quliyevanın vəziyyəti stabildir və müalicəsi davam edir:

"Buna baxmayaraq, xəstə hərbi hospitaldan köçürülərsə, o zaman onun səhhətində əlavə problemlər yarana bilər. Xəstəxanaya gedən yol təmir olunduğundan daşınma zamanı xəstədə qanaxma yarana bilər. Bunu nəzərə alaraq, onun köçürülməsini ləngidirik. Yəqin ki, iki gündən sonra xəstəni Füzuli Rayon Mərkəzi Xəstəxanasına köçürəcəyik".

Qeyd edək ki, iyulun 4-də axşam saatlarında erməni silahlı birləşmələri Füzuli rayonunun Alxanlı kəndini minaatanlardan atəşə tutub. Təxribat nəticəsində Alxanlı kənd sakinləri - 1966-cı il təvəllüdlü Quliyeva Sahibə İdris qızı və onun nəvəsi 2016-cı il təvəllüdlü Quliyeva Zəhra Elnur qızı həlak olub, 1965-ci il təvəllüdlü Quliyeva Sərvinaz İltifat qızı isə ağır yaralanıb.

BAKU.WS