ChatGPT-nin iki yeni versiyası təqdim olundu

"OpenAI" şirkəti yeni nəsil "GPT-5.1 Instant" və "GPT-5.1 Thinking" dil modellərini istifadəyə verib.

BAKU.WS xəbər verir ki, ilk olaraq bu modellərə "ChatGPT Plus" və Pro abunəçiləri çıxış əldə edəcək, daha sonra yeniləmə bir neçə gün ərzində mərhələli şəkildə bütün istifadəçilərə təqdim olunacaq.

"GPT-5.1 Instant" modeli yüksək işləmə sürətinə malikdir və gündəlik ünsiyyət, qısa məktublar, CV-lər və sadə proqramlaşdırma tapşırıqları üçün nəzərdə tutulub. Əvvəlki versiyadan fərqli olaraq, bu model lazım gəldikdə avtomatik şəkildə qısa məntiqi düşünmə rejiminə keçə bilir. Cavabların strukturu da təkmilləşdirilib.

"GPT-5.1 Thinking" isə daha dərin analiz, çoxmərhələli hesablamalar, proqramlaşdırma, planlaşdırma və analitika kimi yüksək dəqiqlik tələb edən tapşırıqlar üçün hazırlanıb. Bu model hesablama resurslarını dinamik şəkildə paylayır: sadə sorğulara tez cavab verir, mürəkkəb suallar üçün isə düşünmə müddətini artırır.

Əsas yeniliklər arasında daha məntiqli ardıcıllıq, konteksti daha yaxşı saxlama və jarqonun minimuma endirilməsi yer alır. Bununla belə, "Thinking" versiyasının cavab sürəti Instant-dan bir qədər yavaşdır.

Eyni zamanda, "OpenAI" ChatGPT-nin fərdiləşdirmə sistemini də yeniləyib. İndi istifadəçilərə altı ünsiyyət tərzi təklif olunur: Default (standart), Friendly (dostyana), Efficient (səmərəli), Professional (peşəkar), Candid (səmimi) və Quirky (özünəməxsus). Seçilmiş ton bütün söhbətlərə tətbiq olunur, eksperimental rejimdə isə bu parametrləri ayrıca tənzimləmək mümkündür.

GPT-5.1 modelləri əvvəlki GPT-5 ailəsinin API-ləri ilə tam uyğunluq saxlayır. Şirkət bildirib ki, yeni versiyalar eyni təhlükəsizlik yoxlamalarından keçib və emosional cəhətdən həssas vəziyyətlər üçün təkmilləşdirilmiş filtrlərlə təchiz olunub.

Baza səviyyəli GPT-5 modelləri isə hələ üç ay müddətində əlçatan olacaq ki, istifadəçilər nəsilləri müqayisə edib öz tapşırıqları üçün ən uyğun konfiqurasiyanı seçə bilsinlər.