Burun spreyləri asılılıq yaradır? – Mütəxəssislər xəbərdarlıq edir

Burun tutulması zamanı geniş istifadə olunan bəzi burun spreyləri uzunmüddətli tətbiq edildikdə asılılıq riski yarada bilər. Mütəxəssislər xüsusilə damar daraldıcı təsirə malik spreylərin nəzarətsiz istifadəsinin təhlükəli olduğunu bildirirlər.

BAKU.WS xəbər verir ki, həkimlərin sözlərinə görə, bu tip preparatlar burun selikli qişasında olan damarları daraldaraq qısa müddətdə rahatlıq yaradır. Lakin 3–5 gündən artıq istifadə edildikdə "rebound effekti" adlanan hal ortaya çıxa bilər. Bu zaman dərmanın təsiri bitdikdən sonra burun tutulması daha da güclənir və insan spreydən yenidən istifadə etməyə məcbur qalır.

Nəticədə davamlı istifadə vərdişə çevrilir. Bu vəziyyət tibbdə medikamentoz rinit kimi tanınır. Uzunmüddətli və nəzarətsiz tətbiq burun selikli qişasının zədələnməsinə, quruluğa və xroniki tıxanıqlığa səbəb ola bilər.

Mütəxəssislər burun spreylərindən yalnız həkim məsləhəti ilə və təlimata uyğun müddətdə istifadə etməyi tövsiyə edirlər. Alternativ olaraq duzlu məhlullar və ya digər müalicə üsulları daha təhlükəsiz hesab olunur.