VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən


Azərbaycanın cənub bölgəsinə yağan aramsız yağışlarla əlaqədar olaraq Nəqliyyat Nazirliyi "Azəryolservis” ASC-nin həmin rayonlar üzrə Yol İstismar İdarələri gücləndirilmiş iş rejimində çalışır.

Bu barədə "Azəryolservis" ASC-nin Mətbuat Katibliyindən BAKU.WS-ə məlumat verilib: "Mövcud olan bütün canlı qüvvə, texnika, maşın və mexanizmlər balansda olan bütün avtomobil yollarında sel suları nəticəsində yaranan problemlərin aradan qaldırılması üçün səfərbər olunub".

Aramsız yağan yağışlar nəticəsində Lənkəran rayonunda "Azəryolservis”in balansında olan İstisu-Havzana yolunun 5-ci kilometrliyində, Mollaoba kəndində, Veravul çayı üzərində və Diryan yolunda yerləşən körpülərin yanaşma yollarının müəyyən hissələrini sel suları yuyub. Əraziyə cəlb olunan canlı qüvvə və texnika vasitəsi ilə həmin hissələr bərpa olunub. Körpülərə heç bir ziyan dəyməyib. Əşlə kəndinə gedən yolda Lənkəran çayı üzərində yerləşən körpünün orta dayağında sel sularının güclü axını nəticəsində bir neçə santimetr çökmə qeydə alınıb. Sözügedən istiqamətlərdə nəqliyyat vasitələrinin hərəkətində hazırda hər hansı bir problem yoxdur.

Məlumatda bildirilib ki, Lerik rayonunda "Azəryolservis”in balansında olan Piran-Veri və Piran-Bürsülü yollarında yerləşən su ötürücüləri sel suları nəticəsində yuyulub dağılsa da, əraziyə cəlb olunan qüvvələr qısa müddət ərzində həmin istiqamətlərdə problemləri aradan qaldıraraq, nəqliyyat vasitələrinin hərəkətini bərpa edib.

Hazırda Lerik rayonunun Vənədi yolunda və Cəlilabad rayonunun Cəlilabad-Seyidbazar avtomobil yolunun 6-cı kilometrliyində su nizamlayıcı boruların sel suları səbəbi ilə yuyularaq dağılması istiqamətində bərpa işləri həyata keçirilir. Yaxın saatlarda həmin istiqamətlərdə də nəqliyyat vasitələrinin hərəkəti bərpa ediləcək.

"Lənkəran-Lerik, Masallı-Yardımlı və Ələt-Astara-İran sərhədi avtomobil yollarında hazırda nəqliyyat vasitələrinin hərəkətində hər hansı bir problem yoxdur. "Azəryolservis” ASC-nin canlı qüvvəsi və texnikası sözügedən yollarda nəqliyyat vasitələrinin rahat və maneəsiz şəkildə hərəkəti üçün işlərini davam etdirir. Hazırda Cəlilabad, Masallı, Yardımlı, Lənkəran və Lerik rayonlarının Nəqliyyat Nazirliyi "Azəryolservis” ASC-nin balansında olan bütün avtomobil yollarında vəziyyət nəzarət altındadır", - qurumdan bildirilib

Ziya Səccad

BAKU.WS