"Pişik qadın" öldü

Plastik əməliyyatları ilə "Pişik qadın" adı qazanmış Coselin Vildenşteyn Parisdə vəfat edib.

BAKU.WS-in xarici KİV-ə istinadən verdiyi xəbərə görə, 84 yaşlı Coselin dekabrın 31-də Parisdə yerləşən bir oteldə dünyasını dəyişib. Onun nişanlısı ölümün ağciyər emboliyası səbəbindən baş verdiyini bildirib.

Qeyd edək ki, Coselin Vildenşteyn plastik əməliyyatlara 5 milyon dollardan çox pul xərcləmişdi. Onun bu cərrahi müdaxilələrə müraciət etməsinin səbəbi ərinin pişiklərə olan sevgisinə uyğun olaraq onlara bənzəmək istəyi idi. O, üst və alt göz qapağı əməliyyatı, qaş qaldırma, üz dartma, dodaq doldurma, çənə böyütmə və yanaq implantları kimi çoxsaylı estetik əməliyyatlar etdirmişdi.

Hərçənd ki, Coselin nəticədən razı qalsa da, onun həyat yoldaşı Alek Vildenşteyn bu dəyişiklikləri qəbul etməmiş və onların nikahı boşanma ilə nəticələnmişdi.

Coselin Vildenşteyn plastik əməliyyatları və həyat tərzi ilə dünya mediasında daim diqqət mərkəzində olub.