Gürcüstanın Baş naziri prezident Zurabişvilini "müxalifətin marionetkası" adlandırıb

Gürcüstan prezidenti Salome Zurabişvili "müxalifətin marionetkasıdır".

BAKU.WS "RİA Novosti"yə istinadən xəbər verir ki, bu ifadəni ölkənin Baş naziri İrakli Kobaxidze səsləndirib.

"Salome Zurabişvili özü etiraf etdi ki, konstitusiyanı pozan prezidentdir və o, öz vəzifəsini Milli Hərəkat Partiyasının (eks-prezident Mixail Saakaşvilinin müxalifət partiyası) impiçmentini dəstəkləmədiyi üçün qoruyub saxlayıb. Buna görə də, o artıq Gürcüstan prezidenti deyil, Milli Hərəkatın prezidentidir, adi bir marionetkadır. Buna görə də, onun sözləri və bəyanatlarının heç bir əhəmiyyəti yoxdur," - deyə baş nazir əlavə edib.

Avqustun 6-da Gürcüstan parlamentinin spikeri Şalva Papuaşvili bildirib ki, Zurabişvili Saakaşvilinin əfv olunmasını nəzərdən keçirir, çünki prezident onunla və "Vahid Milli Hərəkat" partiyası ilə ittifaqdadır. Onun sözlərinə görə, prezident öz vəzifəsini eks-prezidentə və onun partiyasına borcludur.