102 ölkə, 2,7 trilyon zərər... - Koronavirusun FƏSADLARI

Koronavirus epidemiyası dünya iqtisadiyyatına ciddi zərər vurmaqda davam edir.

Modern.az xarici KİV-ə istinadən xəbər verir ki, son məlumata görə, virusa görə iqtisadi zərər 2,7 trilyon dolları keçə bilər.

Dünyada get-gedə daha çox ölkə fövqəladə vəziyyət elan edir. Belə ki, ABŞ-da Nyu-York, İtaliyada isə xəstəliyin mənbəyi olan Lombardiya vilayətində giriş-çıxış bağlanıb.

Ümumdünya Səhiyyə Təşkilatı 102 ölkədə koronavirusun mövcudluğunu təsdiqləyib. Dünyada təsdiqlənmiş yoluxma halları 109 332, ölənlərin sayı 3 820, xəstəlikdən sağalanların sayı 61 869-a çatıb.

Çin koronavirusa görə ən ciddi iqtisadi zərər çəkmiş ölkə sayılır. Ölkəyə idxal 4%, ixrac isə 17,2% azalıb.

Nyu-York qubernatoru Endryu Kuomo koronavirusa görə fövqəladə vəziyyətin elan olunacağını deyib. Ştat ərazisində təsdiqlənmiş xəstə sayı 89-a çatıb.

Misirdə “Luxor Nile” kruiz gəmisində 45 nəfərin virusa yoluxması təsdiq olunub.

Bundan başqa, prezident Donald Tramp və vitse-prezident Maykl Pensin də qatıldığı konfransda iştirak edən şəxslərdən biri də koronavirusa yoluxub.

İtaliyada Pyemont bölgəsinin rəhbəri Alberto Çirio da koronavirusa yoluxmasını rəsmən təsdiqləyib.