Qarabağda şiddətli döyüşlər və ermənilərin böyük itkiləri (VİDEO)

Ermənistan silahlı qüvvələri 2016-cı ilin yalnız 2-5 aprel tarixlərində aparılan döyüşlərdə böyük itkilərə məruz qalıb.

BAKU.WS xəbər verir ki, 320-dən artıq hərbçi məhv edilib və 500-dən artıq erməni hərbi qulluqçusu yaralanıb. Qarşı tərəfin 30-dək tankı və digər zirehli texnikası, 25-dən artıq artilleriya qurğusu sıradan çıxarılıb, Madagiz yaşayış məntəqəsində yerləşən qərargahı və əsas hərbi hissələri məhv edilib.

2-5 aprel tarixləri istisna olmaqla 2016-ci il ərzində düşmən tərəfi 80 nəfər ölü, 110 nəfərə yaxın yaralı olaraq itki verib. Cəmi 2016-cı il ərzində düşmən tərəf 400-dən artıq ölü və 700-dək yaralı verib.

Azərbaycan Müdafiə Nazirliyinin son aylarda erməni diversiya qrupunun məhv edilməsinə dair yaydığı videolardan da görünür ki, qarşı tərəf xeyli itki verir, amma bunlar açıqlanmır.

Ötən gün də düşmənin manevr edən zirehli texnikası müvafiq bölmələrimiz tərəfindən vaxtında aşkar edilərək dərhal məhv edilib. Bunu Ermənistan MN də təsdiqlədi. Nəzərə alsaq ki, zirehli texnikanın ekipajı minimum 3 nəfərdən ibarətdir, deməli itkilər də var.

İrəvanda əsgər analarının etirazları fonunda Sarkiyan hakimiyyətinin çoxsaylı itkiləri gizlətməsi maraq doğurmaya bilməz.

İstiPress-in bu istiqamətdə apardığı araşdırmaları maraqlı faktlar ortaya çıxıb.

İlk olaraq onu qeyd edək ki, Londondakı Beynəlxalq Strateji Tədqiqatlar İnstitutu Ermənistanın 49 min 100 nəfərlik orduya malik olduğunu yazıb. Həmçinin Ermənistanın 210 minə yaxın ehtiyat qüvvəsi var. Lakin işğal olunmuş Azərbaycan ərazilərində erməni silahlı qüvvələrinin sayının nə qədər olduğu barədə belə məlumat yoxdur.

Ermənistan prezidenti Serj Sarkisyan 2014-cü ildə verdiyi açıqlamada bildirmişdi ki, Azərbaycanın işğal edilmiş ərazilərində keçirdikləri hərbi təlimlərə 70 min əsgər cəlb edilib. O, 40 min əsgərin Ermənistan ordusuna, 30 min əsgərin isə "Dağlıq Qarabağ ordusu”na aid olacağını iddia eləmişdi.

Erməni mətbuatı isə bu rəqəmlərin şişirdildiyini bildirmişdi və "Dağlıq Qarabağ ordusunun” sayının 18-20 min arasında dəyişdiyini yazmışdı.

Azərbaycanın müdafiə naziri Zakir Həsənov dəfələrlə bəyan edib ki, Ermənistan hərbi əməliyyatlara müxtəlif ölkələrdən, eyni zamanda, Yaxın Şərq regionundan – Livandan, Suriyadan olan muzdluları cəlb edir.

Yeri gəlmişkən erməni mediasında yazılan hərbi xarakterli məqalələrdən isə aydın olur ki, işğalçı erməni silahlı qüvvələrində xeyli sayda hərbçi var ki, uşaq evlərindən birbaşa orduya cəlb edilib. Qoşunların təmas xəttinə yerləşdirilən kimsəsiz hərbçilərin sayı isə ictimaiyyətdən gizli saxlanılır.

Erməni mediası isə uşaq evlərindən orduya cəlb olunan gənclərin sayının kifayət qədər olduğunu və onların ömürlük silahlı qüvvələrdə xidmət keçdiyini bildirib.

Erməni mediasının bu iddiasında kifayət qədər əsaslar var.

Məsələn, UNİCEF-in açıqladığı rəqəmlərə diqqət edək: Ermənistanda 2014-ci ildə dövlət hesablı 10 "uşaq evi”nə 4900 uşaq daxil olub. Və bu uşaqların 80 faizinin valideynlərindən biri yaşayır. Fikir versəniz burada sadəcə 10 "uşaq evi”ndən və valideynlərindən biri yaşayan uşaqlardan söhbət gedir. Əgər biz 4900 rəqəminin üzərinə hər iki valideynini itirmiş uşaqların sayını da gəlsək böyük bir rəqəm ortaya çıxar.

Ermənistan Statistika Xidmətinin 2014-ci ildə açıqladığı məlumatda isə deyilir ki, həmin ildə rəsmi şəkildə cəmi 50 uşaq yetimxanalardan ailələrə verilib. Bu isə ağır-iqtisadi vəziyyətin hökm sürdüyü Ermənistanda valideyn himayəsindən məhrum xeyli uşaq olduğunu və yetkinlik yaşına çatdıqda isə onların gələcək taleyinin hərbiyə bağlandığını göstərir.

"Uşaq evləri”ndən qeyri rəsmi şəkildə buraxılan və hərbi xidmətə cəlb olunan gənclərin böyük əksəriyyətinin Azərbaycan və Ermənistan qoşunlarının təmas xəttinə yerləşdirildiyi şübhə doğurmur. Erməni mediası yazır ki, uşaq evlərindən orduya cəlb edilən gənclərin cinsinə belə fikir verilmir. Belə ki, qadınlar erməni ordusunda müxtəlif işlərə cəlb edilir.

Məlumata görə, erməni silahlı qüvvələrində müddətdən çox xidmət edən hərbi qulluqçular arasında uşaq evlərindən çıxmış gənclər böyük üstünlük təşkil edir. Beləliklə də qoşunların təmas xəttində böyük itkilər verən Ermənistan ordusu ölən əsgərlərin sayını çox rahat şəkildə gizlədə bilir. Cinayətkar Ermənistan rejimi bununla  silahlı qüvvələrin ehtiyacları üçün də az vəsait xərcləyir.

Bundan başqa, Sarkisyan rejimi məhz Dağlıq Qarabağda yaşayan əhalini pul müqabilində cəbhə xəttində yerləşən postlara cəlb edir. Çünki Qarabağda yaşayan gənclər Ermənistanda deyil, Dağlıq Qarabağ separatçı rejimində qeydiyyatda olurlar.

Bu isə onu deməyə əsas verir ki, erməni silahlı qüvvələrində olan muzdlular və "uşaq evləri”ndən məcburən orduya cəlb edilən kimsəsizlər öldürüldükdə Sarkisyan rejimi onları rahatlıqla ictimaiyyətdən gizlədə bilir. Diqqət yetirsəniz, qarşı tərəf hər dəfə itkilərini açıqlayanda yalnız Ermənistanda qeydiyyatda olan əsgərlərin adını açıqlamağa məcbur olur.

Yəni erməni tərəfi Ermənistandan gətirilən əsgərlərin işğal olunmuş ərazilərimizdə ölməsini açıqlamaq məcburiyyətində qalsa da, Dağlıq Qarabağdan çağırılanların, dünyanın müxtəlif qaynar nöqtələrindən gətirilən erməni əsilli muzdluların ölüm hallarını məharətlə gizlədir və öz xalqını aldadaraq yanlış fikir formalaşdırır.

Bundan başqa, ermənilər əsgərlərinin ölməsi faktlarını yol-nəqliyyat qəzaları, xəstəliklər, bədbəxt hadisələr və silahla ehtiyatsız davranma halı kimi qələmə verirlər.

Ehtiyatda olan polkovnik-leytenant, hərbi ekspert Üzeyir Cəfərov İstiPress-ə müsahibəsində bildirdi ki, cəbhədə hər dəfə döyüşlər baş verəndə Ermənistan silahlı qüvvələri xeyli itki verir, lakin müxtəif yollarla bunu gizlədirlər.

"Ötən ay baş vermiş döyüşlərdə təxmini hesablamalara görə düşmən bizdən 7 dəfə çox itki verib. Özünüz də yaxın günlərdə görəcəksiniz ki, ermənilər öz murdar leşlərinin sayını tədricən, iki gündən, üç gündən bir açıqlamağa başlayacaqlar. Onların öz itkilərini gizlətməsi çox asandır. Bir ucu Şuşa, Xankəndi, digər işğal altında olan ərazilərimizdəki səyyar tibb məntəqələrində onlar öz yaralı və meyitlərini saxlayır, sonra isə onları ya İrəvana, ya da digər şəhərlərin xəstəxana və hospitallarına təxliyyə edirlər”, - deyə polkovnik-leytenant bildirib.

Artıq dünəndən etibarən ermənilər itkilərini özlərinəməxsus şəkildə bir-bir açıqlamağa başlayıblar. Belə ki, Ermənistan-Azərbaycan təmas xəttində atəşkəsin pozulması nəticəsində bir erməni əsgərinin öldüyü barədə xəbər yayılıb.