Sürücülük vəsiqəsi olmadan maşın sürdü, qadını vurub öldürdü

Sumqayıt Ağır Cinayətlər Məhkəməsi keçən il Xırdalan şəhərində "AAAF Park" yaşayış kompleksinin ərazisində baş verən ölümcül yol qəzası ilə bağlı hökm çıxarıb.

BAKU.WS-in məlumatına görə, sürücülük vəsiqəsi olmadan "Mercedes Benz E200" markalı avtomobili idarə edən qadın piyada qadını vuraraq onun ölümünə səbəb olub.

Məhkəmə təqsirləndirilən şəxsi 5 il azadlıqdan məhrum edib, lakin azyaşlı uşağı nəzərə alaraq cəzanın icrasını 14 yaşına çatanadək təxirə salıb.

Hadisə 7 oktyabr 2024-cü il saat 19:00 radələrində "Bolmart" marketinin qarşısında qeydə alınıb. Təqsirləndirilən şəxs qeyri-rəsmi həyat yoldaşının təkidi ilə sükan arxasına əyləşib. Sürət 10-15 km/saat olsa da, piyada qadın (Vladmirovna) qarşısına birdən çıxdığından avtomobili saxlaya bilməyib. Şok vəziyyətində əyləc əvəzinə qaza basıb və qurbanı bir neçə metr uzağa sürükləyib.

Qurban ağır xəsarətlərlə (dalaq və sidik kisəsinin cırılması, ağciyər kontuziyası, sümük sınıqları) Kliniki Tibbi Mərkəzə çatdırılıb və 18 oktyabr 2024-cü ildə travmatik-hemorragik şokdan vəfat edib. Təqsirləndirilən şəxs etiraf edib ki, əvvəllər dəniz kənarında maşın sürməyi öyrənib, lakin vəsiqəsi olmayıb. Hadisədən sonra təcili yardım çağırıb, müalicə xərclərini ödəyib və qurbanın ailəsi ilə barışıb.

Məhkəmə sübutları əsasında təqsiri tam sübuta yetirib. İttiham Azərbaycan CM-in 263-1.3-cü maddəsi (sürücülük hüququ olmadan yol qaydalarını pozaraq ehtiyatsızlıqdan ölümə səbəb olma) ilə irəli sürülüb.