Şəhid oğlu: Atamın indi ziyarət edə biləcəyimiz bir məzarının olması böyük təskinlikdir

İtkin-şəhidin oğlu atasının indi ziyarət edə biləcəkləri bir məzarının olmasının böyük təskinlik olduğunu bildirib.

BAKU.WS xəbər verir ki, bunu "Report"a açıqlamasında nəşinin qalıqları bu gün İmişlidə dəfn olunan I Qarabağ müharibəsinin itkin-şəhidi Mürşüd Nərimanovun oğlu Asim Nərimanov deyib.

O bildirib ki, ailə bütün bu illər ərzində M.Nərimanovun tapılacağı ümidi ilə yaşayıb:

"Mən özüm də İkinci Qarabağ müharibəsinin iştirakçısıyam, Füzuli, Laçın, Şuşa istiqamətlərindəki döyüşlərdə iştirak etmişəm. Torpaqlarımızın işğaldan qarış-qarış azad olunduğunu gördükcə, itkin-şəhidlərimizin tapılacağına da inanırdıq.

Atam 1994-cü ildə Ağdam rayonunun Qərvənd kəndi istiqamətində gedən döyüşlər zamanı itkin düşüb. 32 il gözümüz yollarda qaldı. Artıq onun ziyarət edə biləcəyimiz bir məzarı var. Bu, bizə böyük təskinlikdir".