"Location" gecə klubundakı partlayışdan yazan Aysel: "Həyatda qalmağımın üçüncü ilidir"

Bloger Aysel Şükür 3 il əvvəl "Location" gecə klubunda yaşanan partlayışla bağlı paylaşım edib.

BAKU.WS xəbər verir ki, o həmin partlayışdan əvvəl və sonrakı görüntülərini paylaşaraq "Bu gün həyatda qalmağımın üçüncü ilidir" deyə bildirib.

Aysel gecə klubundakı partlayışdan sonra ağır yaralanıb. O uzun müddət müalicə alıb.

Həmin gün Aysellə birlikdə Türkiyədə yayımlanan məşhur "İşte benim stilim" proqramının üçüncü sezon iştirakçısı, azərbaycanlı model Təranə Rzayeva (Merlin Təranə) da olub. O da ağır yanıq xəsarətləri ilə xəstəxanaya yerləşdirilib.

Qeyd edək ki, Bakıda "Location" gecə klubunda baş vermiş partlayışa görə obyekti icarəyə götürmüş "Merser Food" MMC-nin administratoru Rəsul Rəsulov, həmin MMC-nin təsisçisi-klubun meneceri Orxan Səfərov və Fövqəladə Hallar Nazirliyinin Dövlət Yanğın Nəzarəti Xidmətinin 2-ci Ərazi Dövlət Yanğın Ərazi idarəsinin inspektoru Ruslan Məmmədov həbs edilib. Həbs edilən menecer Orxan Səfərov məkanı qardaşı Elşən Səfərovla birlikdə işlədib.

Xatırladaq ki, 2022-ci il aprelin 3-də "Location" gecə klubunda partlayış baş verib. Hadisə nəticəsində ümumilikdə 4 nəfər həlak olub, 34 nəfər yaralanıb. Partlayış nəticəsində 14 avtomobil, 1 mənzil və 2 qeyri-yaşayış obyektinə ziyan dəyib.