FHN rəsmisi: Bakıda yataqxanadakı yanğının başvermə səbəbi araşdırılır

Bakının Nərimanov rayonunda yataqxanadakı yanğının başvermə səbəbi araşdırılır.

Bunu "Report"a açıqlamasında Fövqəladə Hallar Nazirliyinin (FHN) Dövlət Yanğından Mühafizə Xidmətinin İctimaiyyətlə əlaqə sektorunun rəisi Əlibala Əlizadə deyib.

O bildirib ki, FHN-in "112" qaynar telefon xəttinə Bakının Nərimanov rayonun Əhməd Rəcəbli küçəsində yerləşən beşmərtəbəli yataqxana tipli binada yanğın baş verməsi barədə məlumat daxil olub:

"Əraziyə Fövqəladə Hallar Nazirliyinin qüvvələri cəlb olunub. Yanğın genişlənməsinə imkan verilmədən söndürülüb. Yanğın nəticəsində hər mərtəbəsi 860 kvadratmetr olan binanın beşinci mərtəbəsində bir otaq və ümumilikdə altı ədəd 36 kvadratmetrlik eyvan yanıb. Yanğın zamanı xəsarət faktı qeydə alınmayıb. Yanğın tam olaraq söndürülüb. Hadisənin başvermə səbəbləri araşdırılır".

Sakinlərin sözlərinə görə, binanın üç mərtəbəsində 2 nömrəli peşə məktəbi fəaliyyət göstərib, son dördüncü və beşinci mərtəbələrində isə keçmiş məcburi köçkünlər məskunlaşıb.