AZAL "Buta Airways"ə 7 ədəd "Embraer" sərnişin təyyarəsi verəcək

"Azərbaycan Hava Yolları” (AZAL) QSC 100%-lik törəmə şirkəti olan Azərbaycanın yeni büdcə aviaşirkəti "Buta Airways”in donanmasına 7 ədəd "Embraer” sərnişin təyyarəsi verəcək.

BAKU.WS-ə AZAL-dan bildirilib ki, "Buta Airways”ə keçəcək "Embraer” sərnişin təyyarələri artıq AZAL-ın sərnişin aviaşirkətinin tərkibində olmayacaq: "Sözügedən təyyarələrlə uçuşları yalnız "Buta Airways” həyata keçirəcək. Bunun əsasında yaradılan aviaşirkətin öz donanması, öz işçi ştatı və müstəqil tarif siyasəti olacaq. Yeni təyyarələrin alınması nəzərdə tutulmur. Hazırda bu və digər aspektlər üzərində iş aparılır. Büdcə aviaşirkətinin fəaliyyətə başlaması üçün tədbirlər görülür. Aviaşirkətin uçuşlara gələn ilin payız aylarında başlayacağı gözlənilir”.

"Hazırda bütün reyslərində baza tarifinin qiyməti vergi və rüsumlar da daxil olmaqla 49 avro təşkil edən "AZALJET” brendi altında 13 istiqamət üzrə uçuşlar yerinə yetirilir. Bu reyslərdə satış və uçuş sxemi lou-kosterlərə yaxındır. Yəni, sərnişinlərə bəzi xidmətlər seçimi ödənişli variantlar şəklində təqdim edilir. Gələn ilin payız aylarında uçuşlara başlaması planlaşdırılan "Buta Airways” və "AZALJET”də qiymətlərin və uçuşların necə tənzimlənəcəyi hələ müəyyənləşdirilməyib. Hazırda bu istiqamətdə ciddi işlər aparılır”, - deyə AZAL-dan bildirilib.

Qeyd edək ki, dekabrın 14-də "Azərbaycan Hava Yolları”nın İdarə Heyətinin iclasında Azərbaycanın aşağı büdcəli yeni aviadaşıyıcısının yaradılması barədə qərar qəbul edilib. "Buta Airways” adlandırılan yeni büdcə aviaşirkəti Heydər Əliyev Beynəlxalq Hava Limanında yerləşəcək.

BAKU.WS