Sarvan Cəfərov: "Şirkətlərlə 100,5 min hektar sahədə pambıq istehsalı üçün müqavilə bağlanılıb"
![Sarvan Cəfərov: Şirkətlərlə 100,5 min hektar sahədə pambıq istehsalı üçün müqavilə bağlanılıb](https://baku.ws/storage/photos/thumbs/large/1713801721_db8c7117-a143-3c18-9e0c-6e9fe0881b90_850.webp)
Aprelin 22-dək respublika üzrə pambıq emalı və tədarükü şirkətləri tərəfindən 15 167 mülkiyyətçi ilə 100,5 min hektar sahədə pambıq istehsalı məqsədilə müqavilə bağlanılıb.
“Report” xəbər verir ki, bunu kənd təsərrüfatı nazirinin müavini Sarvan Cəfərov nazirlikdə keçirilən pambıqçılığa həsr olunmuş iclasda bildirib.
Onun sözlərinə görə, həmin sahələrin 98,3 min hektarında şum işləri başa çatdırılıb, 48.3 min hektarında arat aparılıb: “Hazırkı dövrdə ölkə üzrə 38 min ha sahədə çiyid səpini həyata keçirilib və pambıqçılıq rayonlarında çiyid səpini prosesi davam edir”.
S. Cəfərov bildirib ki, pambıqçılıq ölkəmizdə güclü ənənələri olan kənd təsərrüfatı sahələrindən biridir. O qeyd edib ki, Azərbaycanda pambıqçılığın inkişafı istiqamətində kompleks tədbirlər həyata keçirilir, dövlət tərəfindən pambıqçılığın inkişafına dəstək tədbirləri davam etdirilir.
Tədbirdə cari ildə pambıq istehsalına hazırlıq, qarşıda duran vəzifələr, pambıqçılığın inkişafı və hədəflər müzakirə edilib. Pambıqçılıq sahəsində innovativ becərmə, müasir suvarma texnologiyalarının və qabaqcıl təcrübələrin tətbiqinin genişləndirilməsi, elmi-tədqiqat müəssisələri tərəfindən yüksək keyfiyyət göstəricilərinə malik tez yetişən pambıq sortlarının yaradılması, pambıqçılıq sahəsində fəaliyyət göstərən mütəxəssislərin bilik və bacarıqlarının artırılması məqsədilə qısa müddətli təlim kurslarına cəlb edilməsi, texnika, gübrə, toxum, dərman və su təminatı, subsidiyaların verilməsi ilə bağlı məsələlər ətrafında fikir mübadiləsi aparılıb, rəy və təkliflər qeydə alınıb.
İclasda pambıq toxumçuluğunun inkişaf etdirilməsi, toxuma olan tələbatın yerli istehsal hesabına təmin olunmasının prioritet vəzifələrdən olduğu bildirilib. Pambıq toxumçuluğun inkişaf etdirilməsi və toxumçuluq təsərrüfatlarının yaradılması istiqamətində Kənd Təsərrüfatı Nazirliyi tərəfindən zəruri tədbirlərin həyata keçirildiyi vurğulanıb. Tədbir iştirakçıları yerli pambıq toxumçuluğunun inkişaf perspektivləri barədə danışıb, pambıq toxumu istehsalı ilə əlaqədar Bitki Mühafizə və Texniki Bitkilər Elmi-Tədqiqat İnstitutu ilə əlaqələrin daha da genişləndirilməsinin zəruri olduğunu bəyan ediblər.
Müzakirələrin sonunda bu formatda görüşlərin davam etdiriləcəyi bildirilib, qaldırılan məsələlərin operativ həlli üçün müvafiq tapşırıqlar verilib.
Qeyd edək ki, pambıqçılığa həsr olunmuş iclasda Kənd Təsərrüfatı Nazirliyi Aparatının və tabeli qurumlarının məsul şəxsləri, Pambıq İstehsalçıları Assosiasiyasının üzvləri, pambıq tədarükü və emalı şirkətlərinin rəhbərləri iştirak ediblər.
Oxşar xəbərlər
Hansı bankdan nə qədər dollar almaq olar? – MƏBLƏĞLƏR
Bu gün martın 15-də xarici valyuta satan bankların sayı 29-a çatıb. BAKU.WS-in məlumatına görə, fins.az-ın araşdırması göstərdi ki, bu gün dolları 19 bank limi...