Zelenski ABŞ-ni Kadırovu Maduro kimi həbs etməyə çağırıb

Ukrayna Prezidenti Volodimir Zelenski ABŞ-ni Çeçenistana hərbi desant endirərək Ramzan Kadırovu Venesuela Prezidenti Nikolas Maduro kimi həbs etməyə çağırıb.

BAKU.WS xəbər verir ki, bu barədə "RBK-Ukrayna" məlumat yayıb.

"Hamı nəticəni gördü. Bütün dünya. Bunu tez etdilər. Qoy Kadırovla bağlı da buna bənzər hansısa bir əməliyyat həyata keçirsinlər", – deyə Zelenski bildirib.

Ukrayna liderinin sözlərinə görə, bu cür addımlar Rusiya Prezidenti Vladimir Putini düşünməyə vadar edə bilər.

Qeyd edək ki, Zelenski yanvarın 3-də baş verən hadisələrə işarə edib. Həmin gün ABŞ ordusu Venesuelaya bir sıra zərbələr endirib və Prezident Nikolas Maduro ilə onun həyat yoldaşı Siliya Floresi saxlayaraq ABŞ-yə aparıb. Onlar narkoterrorizm, qanunsuz silah saxlama və narkotik qaçaqmalçılığı maddələri üzrə mühakimə olunurlar.

Məhkəmənin ilk iclası yanvarın 5-də keçirilib. Maduro özünü təqsirli bilməyib. Onun həyat yoldaşı da irəli sürülən ittihamları qəbul etməyib.

Bundan sonra Venesuelada prezident səlahiyyətlərinin icrası vitse-prezident Delsi Rodrigesə tapşırılıb. ABŞ Prezidenti Donald Tramp Rodrigesi doğru qərarlar verməyəcəyi təqdirdə ağır bədəl ödəyəcəyi ilə hədələyib. Öz növbəsində Delsi Rodriges Trampı sülhə və dialoqa çağırıb.