Türkiyənin 11 gəmisi Hörmüz Boğazını təhlükəsiz keçib

Nəqliyyat və İnfrastruktur naziri Abdulkadir Uraloğlu bildirib ki, müharibənin başlanmasından bu yana Türkiyəyə məxsus 11 gəmi Hörmüz Boğazını təhlükəsiz şəkildə keçərək Körfəz bölgəsindən çıxıb.

BAKU.WS xəbər verir ki, nazirin açıqlamasına görə, Hörmüz Boğazı və Bəsrə Körfəzindəki vəziyyət daim izlənilir, bölgədə olan gəmilər və vətəndaşlarla mütəmadi əlaqə saxlanılır.

Sosial media hesabında paylaşım edən nazir qeyd edib ki, 21 iyun səhəri daha 2 gəminin çıxması ilə birlikdə müharibənin başlanğıcından bu yana ümumilikdə 11 Türk gəmisi Hürmüz Boğazını təhlükəsiz şəkildə keçərək Körfəzdən ayrılıb.

Hazırda Hörmüz Boğazı və Bəsrə Körfəzində ümumilikdə 7 gəmidə 177 Türkiyə vətəndaşı xidmət göstərir. Həmin gəmilərdən biri Türkiyə bayrağı daşıyır.

Qeyd olunub ki, bütün şəraitdə vətəndaşların və gəmilərin təhlükəsizliyi üçün zəruri tədbirlər görülməkdə davam edir.