Trampın gəlirlərində kriptovalyuta ilk dəfə daşınmaz əmlakı geridə qoyub

ABŞ Prezidenti Donald Tramp 2025-ci il üzrə maliyyə bəyannaməsində kriptovalyuta əməliyyatlarından 1 milyard dollardan çox gəlir əldə etdiyini açıqlayıb.

BAKU.WS xəbər verir ki, 927 səhifəlik maliyyə hesabatına əsasən, Tramp vəzifəyə başlamazdan bir neçə gün əvvəl dövriyyəyə buraxdığı öz adına yaradılmış "meme coin"dən 635 milyon dollar müəlliflik gəliri əldə edib.

Bundan əlavə, oğulları və ABŞ-nin xüsusi nümayəndəsi Stiv Uitkoffun övladlarının təsis etdiyi World Liberty Financial kriptovalyuta şirkətindən 500 milyon dollardan çox gəlir əldə olunduğu bildirilib.

Sənəddə qeyd olunur ki, Tramp daşınmaz əmlak layihələri, qolf klubları və öz brendi altında satılan məhsullardan da milyonlarla dollar gəlir əldə edib. Bununla belə, ilk dəfə olaraq kriptovalyutadan qazandığı gəlirlər onun daşınmaz əmlak biznesindən əldə etdiyi gəlirləri üstələyib.

Ağ Ev Trampın prezident vəzifəsindən şəxsi mənfəət əldə etməsi ilə bağlı iddiaları rədd edib. Qurum bildirib ki, Tramp biznesini oğullarının idarə etdiyi fond vasitəsilə həyata keçirir və maraqlar toqquşması mövcud deyil.

Maliyyə hesabatında həmçinin Trampın müxtəlif məhkəmə çəkişmələri üzrə əldə etdiyi milyonlarla dollarlıq kompensasiyalar da əks olunub. Bildirilib ki, bu vəsaitin böyük hissəsi gələcək prezident kitabxanasına və qeyri-kommersiya layihələrinə yönəldiləcək.

Sənədə əsasən, ABŞ-nin birinci xanımı Melaniya Tramp da 2025-ci ildə sənədli filmlə bağlı lisenziya müqaviləsindən 10,7 milyon dollar, NFT satışlarından isə 6 milyon dollar gəlir əldə edib.