TIME jurnalından Bodruma böyük diqqət – "Dünyanın ən heyrətamiz yerləri" siyahısında yer aldı

Amerikanın nüfuzlu TIME jurnalı, 2025-ci il üçün hazırladığı "Dünyanın ən heyrətamiz yerləri" siyahısını açıqlayıb.

BAKU.WS cnntürk-ə istinadən xəbər verir ki, səyahət, mətbəx, mədəniyyət və innovasiya sahələrində fərqlənən 100 unikal məkanın daxil edildiyi bu siyahıda Türkiyə də təmsil olunub.

TIME jurnalı bu ilki seçimində yalnız təbiət gözəlliklərini deyil, həm də mədəni zənginlik, davamlı turizm və yenilikçi təcrübələr təqdim edən məkanlara üstünlük verib. Siyahıda Cənubi Amerikadan Asiyaya, Avropadan Afrikaya qədər geniş coğrafiyadan maraqlı destinasiyalar yer alıb.

Türkiyəni bu siyahıda təmsil edən məkan isə Bodrumdakı Maxx Royal Bodrum oteli olub. Otel yalnız dəbdəbəli istirahət imkanları ilə deyil, həm də davamlılıq baxışı və özünəməxsus memarlığı ilə diqqət çəkərək beynəlxalq səviyyədə tanınıb.

Digər seçilən məkanlar arasında Perunun Lima şəhərindəki AWA restoranı, Amazon mətbəxini müasir tərzdə təqdim etməsi ilə fərqlənib. Zimbabvedə Viktoriya şəlalələri yaxınlığında yerləşən Mbano Manor Hotel, yerli mədəniyyətlə lüksü birləşdirməsi ilə seçilib. ABŞ-ın Arizona ştatındakı Flagstaff bölgəsi, Lowell Rəsədxanası ilə bənzərsiz səma müşahidəsi təcrübəsi təqdim edir. Fransanın paytaxtı Parisdə isə yenidən ziyarətə açılan Notre Dame Katedrali, tarixi irsin dirçəlişini simvolizə etdiyi üçün siyahıya daxil edilib.