İrandakı etirazlarda saxlanılanların sayı açıqlandı

İrandakı etirazlar zamanı 297 nəfər saxlanılıb.

BAKU.WS Oxu.Az-a istinadən xəbər verir ki, bu barədə İranın İctimai Təhlükəsizliyin Təmin Edilməsi üzrə Polis İdarəsinin rəhbəri IRIB dövlət teleradio şirkətinin efirində məlumat verib.

O iddia edib ki, saxlanılan şəxslər dini, dövlət və ictimai müəssisələrin dağıdılmasında iştirak ediblər, həmçinin təhlükəsizlik orqanlarının əməkdaşlarına qarşı terror hücumları törədiblər.

Xatırladaq ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, etirazçılar paytaxtda 25 məscidi yandırıb, 26 bank, üç tibb mərkəzi, 10 dövlət müəssisəsi, 48 yanğınsöndürən maşın, 42 avtobus və təcili yardım maşını, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ni təqsirləndirib.