iPhone üçün detal istehsal edən zavod bağlanıb

iPhone üçün detal istehsal edən Tata Electronics Private Limited zavodu qeyri-müəyyən müddətə fəaliyyətini dayandırıb.

BAKU.WS The Business Standard-a istinadən xəbər verir ki, Hindistanın cənubundakı Tamil Nadu ştatında yerləşən müəssisədə yanğın qeydə alınıb.

Məlumata görə, müəssisədə yanğın şənbə günü, sentyabrın 28-də baş verib. iPhone arxa panelləri və detallarının istehsalının yerləşdiyi bina içəridən və xaricdən güclü şəkildə yanıb. Hindistan Səhiyyə Nazirliyinin yüksək vəzifəli əməkdaşı Şilpa Prabhakar Satishin sözlərinə görə, binanın damı qismən uçub.

"Yanğın zamanı zədələnmiş blokların sökülməsi zamanı yenidən yanğın və ya tüstü yarana biləcəyi üçün zavodda yanğınsöndürən maşınlar yerləşdirmişik", - deyə rəsmi məlumatda bildirilib.

Apple hadisə ilə bağlı açıqlama verməyib. Tata isə yanğının səbəbinin araşdırıldığını bildirib. Dəymiş ziyanın məbləği hələlik açıqlanmayıb.