Günəşdə güclü partlayış olub

Bu gün səhər saatlarında Günəşdə yüksək gücə malik partlayış baş verib.

BAKU.WS xəbər verir ki, hadisə Bakı vaxtı ilə 05:07 qeydə alınıb. Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyası bildirib ki, X2.5 sinfinə aid bu alışma son təxminən 2,5 ay ərzində müşahidə olunan ən güclü partlayış hadisələrindən biridir.

Qeyd olunur ki, partlayış güclü plazma atımı ilə müşayiət olunub və bu proses kosmik teleskop görüntülərində aydın şəkildə əks olunub. Eyni zamanda, partlayışın baş verdiyi sahə Günəş diskinin kənarına yaxın yerləşdiyindən plazmanın əsas hərəkət istiqaməti Yerə deyil, yan tərəfə yönəlib.

Mütəxəssislər hesab edirlər ki, bu səbəbdən hadisənin Yer üçün ciddi təhlükə yaratma ehtimalı aşağıdır. Daha dəqiq qiymətləndirmənin gün ərzində aparılacaq modelləşdirmə nəticəsində veriləcəyi bildirilir.