Ermənistanın dövlət borcu 2024-cü ilin birinci yarısında 12,1 milyard dollara çatıb

2024-cü ilin birinci yarısının nəticələrinə görə, Ermənistanın dövlət borcu 12 milyard 157 milyon dollara çatıb.

BAKU.WS Ermənistan mətbuatına istinadən xəbər verir ki, bu barədə ölkənin maliyyə naziri Vahe Hovhannisyan 2024-cü ilin birinci yarısı üzrə dövlət büdcəsinin icrası haqqında hesabatın müzakirəsi zamanı bildirib. 

Onun sözlərinə görə, söhbət 4 trilyondan 718 milyard dramdan gedir. "Bizim göstəricilərimiz idarəolunan səviyyədədir. Maraqlıdır ki, orta ödəniş müddəti ilin əvvəli ilə müqayisədə bir qədər azalaraq 7,1 ilə çatıb", - Hovhannisyan bildirib.

Eyni zamanda, Vahe Hovhannisyan qeyd edib ki, növbəti illərdə borclara xidmətlə bağlı yük daha da artacaq. O cümlədən, gələn ilin əvvəlində 300 milyon dollardan artıq avrobondlar üzrə ödənişlər nəzərdə tutulub.