Embraer şirkətinin gəlirləri nə qədər olub? - 1.69 milyard ABŞ dolları

"Embraer 190" Braziliyanın "Embraer" şirkəti tərəfindən istehsal edilən qısa və orta məsafəli uçuşlar üçün nəzərdə tutulmuş iki mühərrikli, dar gövdəli sərnişin təyyarəsidir.

BAKU.WS-in məlumatına görə, bu model, 100-ə yaxın sərnişin tutumu və 3,000-4,000 km uçuş məsafəsi ilə regional hava yolları üçün ideal seçimdir.

"Embraer" şirkəti 2024-cü ilin üçüncü rübündə maliyyə nəticələri əldə edib. Şirkətin gəliri 32% artaraq 1.69 milyard ABŞ dollarına çatıb. Hər səhm üzrə düzəldilmiş gəlir isə keçən ilin eyni dövründəki 18 sentdən 1.20 ABŞ dollarına yüksəlib.

Bu nəticələr analitiklərin gözləntilərini üstələyib. Şirkət 2024-cü il üçün gəlir proqnozunu 6 milyarddan 6.4 milyard ABŞ dollarına qədər saxlayıb, lakin kommersiya təyyarələrinin çatdırılma proqnozunu 72-80 ədəddən 70-73 ədədə endirib. Üçüncü rübdə "Embraer" 59 təyyarə çatdırıb ki, bu da 2023-cü ilin eyni dövrü ilə müqayisədə 37% artım deməkdir. Şirkətin sifariş portfeli isə 22.7 milyard ABŞ dolları ilə doqquz ilin ən yüksək səviyyəsinə çatıb.

"Embraer"in səhmləri 2024-cü ildə əhəmiyyətli dərəcədə dəyər qazanıb. Şirkət, illik 20% gəlir artımı gözləntisini qoruyub saxlayır və bu da investorların marağını artırır. Şirkət həmçinin elektriklə işləyən şaquli qalxma və enmə (eVTOL) təyyarələrinin inkişafı ilə bağlı layihələr üzərində çalışır ki, bu da gələcəkdə şirkətin bazar dəyərinə müsbət təsir göstərə bilər.

"Embraer 190" təyyarəsi, yüksək yanacaq səmərəliliyi və aşağı əməliyyat xərcləri ilə tanınır. Bu xüsusiyyətlər, hava yollarının əməliyyat xərclərini azaltmağa və sərnişinlərə daha sərfəli uçuşlar təklif etməyə imkan verir. Bundan əlavə, təyyarənin dizaynı və rahat oturacaqları sərnişinlər üçün komfortlu səyahət təmin edir.

Qeyd edək ki, "Azərbaycan Hava Yolları" sərnişin aviaşirkətinin J2-8243 nömrəli Bakı-Qroznı reysini yerinə yetirən "Embraer 190" təyyarəsi dekabrın 25-də Qazaxıstanın Aktau hava limanından 3 km məsafədə qəzaya uğrayıb. Aktau şəhərində qəzaya uğrayan "Embraer 190" təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub. Qəza nəticəsində ümumilkdə 38 nəfər həlak olub.

Orxan Hüseyn