Əkrəm İmamoğlunun sosial şəbəkə hesablarının bağlanması üçün müraciət edildi

Türkiyəli vəkil Burak Bəkiroğlu həbsdə olan CHP-nin prezidentliyə namizədi və İstanbul Böyükşəhər Bələdiyyə Başçısı Əkrəm İmamoğlunun sosial media hesablarına girişin qarşısını almaq üçün Sülh Məhkəməsinə müraciət etdiklərini açıqlayıb.

BAKU.WS xəbər verir ki, o, bu barədə X hesabında məlumat yayıb.

Vəkil, İmamoğlunun İstanbul Respublika Prokurorluğu Mütəşəkkil Cinayətkarlıqla Mübarizə Bürosu tərəfindən aparılan istintaq çərçivəsində həbs olunduğunu xatırladıb və bunları qeyd edib:

"Şübhəli Əkrəm İmamoğlunun iddia edilən cinayət təşkilatının məqsədləri, prinsipləri və hədəflərinə uyğun olaraq həbsxanadan verdiyi təlimatla X hesabını üçüncü şəxslər tərəfindən istifadə edilməsinə icazə verərək, ölkəmizdə fəaliyyət göstərən yerli firmalara qarşı boykot çağırışı edərək, ictimaiyyəti çaşdıran məlumatlar yayaraq iqtisadiyyatımızı pozmağa cəhd etdiyi müəyyən olunduğundan X hesabının mühakimə sonuna qədər Türkiyədən girişlərə bağlanması üçün İstanbul Sülh Məhkəməsinə müraciət edilmişdir".