Dünyada ağcaqanadsız ölkə kimi tanınan İslandiyada ilk dəfə ağcaqanada rast gəlindi

Dünyada ağcaqanadın rast gəlinmədiyi nadir ölkələrdən biri sayılan İslandiyada ilk dəfə təbii şəraitdə ağcaqanad aşkarlanıb.

BAKU.WS xəbər verir ki, İslandiya Təbiət Elmləri İnstitutunun mütəxəssisi Matias Alfredsson, paytaxt Reykyavikdən təxminən 30 kilometr şimalda üç "Culiseta annulata" növünə aid ağcaqanad tapıldığını bildirib.

Ağcaqanadlar adətən kəpənəkləri cəlb etmək üçün istifadə olunan, isti şərab və şəkər qarışığına batırılmış tələlərdə aşkarlanıb. Bu, ölkədə ağcaqanadların ilk təbii müşahidəsi hesab olunur.

Alimlər həşəratların gəmilər və ya konteynerlərlə ölkəyə gətirilmiş ola biləcəyini ehtimal edir. Onların fikrincə, iqlim dəyişikliyi və qışların yumşalması ağcaqanadların bu kimi soyuq bölgələrdə də yaşamasına şərait yarada bilər.