Donald Tramp: "Putin mənimlə görüşmək istəyir; bu görüşü təşkil edirik"

ABŞ-nin yeni seçilmiş prezidenti Donald Tramp Rusiya prezidenti Vladimir Putinin onunla görüşmək istədiyini və bu görüşün təşkil edildiyini bildirib.

BAKU.WS xəbər verir ki, bu barədə Tramp açıqlamasında bildirib.

Tramp, Floridadakı Mar-a-Lago malikanəsində Respublikaçı qubernatorlarla görüşdən sonra mətbuata qısa açıqlama verib.

O, açıqlamasında Rusiya-Ukrayna müharibəsinə toxunaraq Putinin onunla görüşmək arzusunda olduğunu qeyd edib:

"Putin mənimlə görüşmək istəyir; bu görüşü təşkil edirik. Prezident Putin bunu açıq şəkildə ifadə edib. Biz bu müharibəni dayandırmalıyıq, çox qanlı bir müharibədir," - deyə Tramp bildirib.

Görüşün nə zaman baş tutacağı barədə isə əlavə məlumat verməyib.

Qeyd edək ki, Tramp daha əvvəl də prezidentlik kreslosuna əyləşdikdən sonra Rusiya-Ukrayna müharibəsini qısa müddətdə sona çatdırmaq istədiyini və bunun üçün Putinlə görüşməyə hazır olduğunu bəyan etmişdi.