Dərbənddə silahlı atışma: Bir ölü, bir yaralı - ANBAAN VİDEO

Dərbənddə baş verən atışma nəticəsində bir polis əməkdaşı yaralanıb, hücum edən şəxs isə zərərsizləşdirilib.

BAKU.WS xəbər verir ki, bu barədə Dağıstan Respublikası Daxili İşlər Nazirliyi məlumat yayıb.

"Silahlı hücum Dərbənd şəhərinin Maxaçkala küçəsində baş verib. Avtomobil sürücüsü polisin dəfələrlə dayanmaq tələblərinə məhəl qoymayaraq qaçmağa cəhd edib, bilərəkdən polis əməkdaşını vurub və əməkdaşların üzərinə bir neçə dəfə atəş açıb. Cavab olaraq polis əməkdaşları tabel silahından istifadə ediblər", – deyə hüquq-mühafizə orqanlarından bildirilib.

Qeyd olunur ki, polis əməkdaşlarının cavab atəşi nəticəsində hücum edən şəxs zərərsizləşdirilib. Yaralanan polis əməkdaşı dərhal hospitala çatdırılıb və əməliyyat olunub – onun həyatına təhlükə yoxdur.