ABŞ-də ICE rəhbəri istefa verdi – səbəblər açıqlanmayıb

ABŞ-nin İmmiqrasiya və Gömrük Mühafizə Xidmətinin (ICE) müvəqqəti direktoru Todd Lyons vəzifəsindən istefa verib. Onun may ayının sonunda postunu tərk edəcəyi bildirilib.

BAKU.WS xəbər verir ki, 2025-ci ildən quruma rəhbərlik edən Lyonsun istefa səbəbi ilə bağlı rəsmi açıqlama verilməyib. Onu kimin əvəz edəcəyi də hələ məlum deyil.

ICE ABŞ-də miqrasiya nəzarətinə cavabdeh federal qurumdur və sərt əməliyyat üsullarına görə uzun müddətdir tənqid olunur.

Son aylarda qurum ətrafında təzyiqlərin artdığı qeyd edilir. Xüsusilə 2026-cı ilin yanvarında Minneapolis şəhərində keçirilən etirazlar zamanı iki nəfərin ölümü ICE-in fəaliyyəti ilə bağlı müzakirələri gücləndirib.

Bu hadisələrdən sonra qurumun əməliyyatlarında güc tətbiqi və insan haqları ilə bağlı iddialar yenidən gündəmə gəlib.

Todd Lyonsun istefası fonunda ABŞ-də miqrasiya siyasəti və ICE-in rolu ətrafında mübahisələrin davam edəcəyi gözlənilir.