60 ildir qorunan inanılmaz ÖZƏLLİK - Sakinlər də buna riayət edir

Türkiyənin Vanı şəhərinin Özalp rayonunda yerləşən Emek məhəlləsi 60 ildir öz unikallığını qoruyub saxlayan nadir yaşayış məkanlarından biridir.

BAKU.WS xəbər verir ki, 1964-cü ildə xüsusi diqqətlə və tam simmetrik plana əsasən salınan bu məhəllənin evləri həm memarlıq üslubu, həm də payızın yaratdığı rəng harmoniyası ilə seyr edənləri valeh edir.

1965-ci ildə Trabzonun Çaykara rayonundan bölgəyə köç edən qaradənizli ailələr üçün inşa olunan Emek məhəlləsi bu gün də ilkin memarlıq xəttini qoruyur. Məhəllə sakinləri evlərinə sonradan edilən əlavələrdə belə əsas dizayna xələl gətirməməyə çalışaraq bu memarlıq irsinə hörmət etdiklərini göstərirlər.

Havadan çəkilən görüntülərdə simmetrik evlər və onların arasından uzanan saralmış ağaclar valehedici mənzərə yaradır. Sarı və qəhvəyi çalarların evlərlə yaratdığı kontrast məhəlləni payızın ən gözəl rənglərinə bürüyür.

Paralel şəkildə uzanan küçələr, eyni memarlıq xəttinə malik evlər və payız işığının binaların fasadına düşməsi məhəlləni tam bir kartpostal görüntüsünə çevirir. Emek məhəlləsi həm tarixi quruluşu, həm də mövsümün təqdim etdiyi təbiət rəngləri ilə bölgənin ən diqqətçəkən məkanlarından biri hesab olunur.

Qalereya