5G istifadəçilərinin sayı 3 milyardı keçdi – 6G üçün geri sayım başladı

Dünyada 5G texnologiyasının yayılması sürətlənir. Ericsson-un 2026-cı ilin iyun ayında açıqladığı Mobillik Hesabatına əsasən, bu ilin ilk rübündə qlobal 5G abunəçilərinin sayı 162 milyon artaraq 3 milyardı keçib.

BAKU.WS xəbər verir ki, hesabata görə, 2031-ci ilin sonuna qədər bu rəqəmin 6,4 milyarda çatacağı gözlənilir. Hazırda dünya üzrə 390-a yaxın operator kommersiya məqsədli 5G xidməti təqdim edir.

Mütəxəssislər bildirirlər ki, süni intellektin inkişafı mobil şəbəkələrə tələbatı daha da artıracaq. Hesabatda qeyd olunur ki, 2031-ci ilə qədər mobil məlumat trafiki, xüsusilə də yükləmə həcmi əhəmiyyətli dərəcədə artacaq.

Sənəddə həmçinin vurğulanır ki, ilk 6G standartlarının 2028–2029-cu illərdə tamamlanması, kommersiya xidmətlərinin isə 2030-cu ildən istifadəyə verilməsi gözlənilir.