5 iyun – Ümumdünya Ətraf Mühitin Mühafizəsi Günüdür

Bu gün dünyada ətraf mühitin mühafizəsinə həsr olunan beynəlxalq gün qeyd olunur.

5 iyun tarixi Birləşmiş Millətlər Təşkilatı tərəfindən təsis edilmiş Ümumdünya Ətraf Mühitin Mühafizəsi Günüdür. Bayramın əsas məqsədi ekoloji problemlərə diqqət çəkmək və bu sahədə qlobal həmrəyliyi artırmaqdır.

Ətraf mühitin mühafizəsi günü 1972-ci ildə BMT Baş Assambleyasının qərarı ilə təsdiqlənib. Tarix təsadüfi seçilməyib – həmin il 5 iyunda İsveçin Stokholm şəhərində İnsan Ətraf Mühitinə dair ilk beynəlxalq konfrans işə başlayıb. Həmin iclasdan sonra UNEP – BMT-nin Ətraf Mühit Proqramı yaradılıb.

Bu günün qeyd olunması insanlarda təbiətə qarşı məsuliyyət hissini gücləndirməyi, eləcə də ətraf mühitin mühafizəsinə yönəlmiş tədbirlərin təşviq edilməsini hədəfləyir.

Planetin ekosistemləri son illərdə ciddi zərər görüb. Dünya hər üç saniyədə bir futbol meydanı böyüklüyündə meşə sahəsini itirir. Əkin sahələri, meşələr, bataqlıqlar, göllər və digər təbii ərazilər deqradasiyaya uğrayır. Yer kürəsinin torpaqlarının 40 faizi artıq sıradan çıxıb. Bu isə dünya əhalisinin yarısına birbaşa təsir edir.

2000-ci ildən bəri quraqlıqların sayı və müddəti 29 faiz artıb. Əgər təcili tədbirlər görülməzsə, 2050-ci ilə qədər dünya əhalisinin 75 faizindən çoxu quraqlığın təsirinə məruz qala bilər. Təbiətin məhv edilməsi pandemiyalara da zəmin yaradır – bunun bariz nümunəsi COVID-19 oldu.

Bu gün, eyni zamanda, ətraf mühitin qorunması ilə bağlı həm fərdi, həm də kollektiv məsuliyyətin simvoludur. Hər il minlərlə insan bu gün münasibətilə müxtəlif ekoloji təşəbbüslərə qoşulur – ağacəkmə aksiyaları keçirilir, maarifləndirmə kampaniyaları təşkil olunur.

Hər il Ümumdünya Ətraf Mühitin Mühafizəsi Günü fərqli deviz altında keçirilir. Bayramın əsas mövzusu və tədbirlərin harada təşkil olunacağı BMT tərəfindən müəyyən edilir. Bu gün hər bir insana – planetin gələcəyinə töhfə vermək üçün real addımlar atmaq imkanı yaradır.