122 yaşlı İraq türkməni Emşə Aslan Osmanlı dövrünü xatırlayır

İraqın Mosul vilayətinə bağlı Telafer bölgəsində yaşayan və Osmanlının son dövrlərinə, eləcə də İngilislərin İraqı işğal etməsinə şahidlik edən 122 yaşlı Emşə Aslan həmin dövr haqqında danışıb.

BAKU.WS haberler.com-a istinadən xəbər verir ki, o, Osmanlı dövründə təhlükəsiz, sabit və sosial cəhətdən gözəl həyat yaşadıqlarını bildirib.

"İngilislərin işğalını dünən kimi xatırlayıram"

1 iyul 1902-ci ildə yalnız türkmənlərdən ibarət olan Telafer bölgəsində doğulan və sağlamlığı yaxşı olan altı uşaq anası Aslan Birinci Dünya Müharibəsi zamanı İngilis əsgərlərinin Telaferi qərb istiqamətindən işğal etməyə başladığını deyib. O, İngilis əsgərlərinin at arabaları və silahlarla bölgəyə daxil olduqlarını, o zaman gənc olduğunu və bu mənzərəni evlərin pəncərələrindən izlədiklərini xatırlayıb.

Aslan bildirib ki, İngilislər Telaferi işğal etdikdən bir-iki gün sonra Mosula doğru irəliləyiblər. İşğal dövründə qıtlıq yaşandıqlarını və İngilis əsgərlərinin qida ehtiyatlarını özləri ilə daşıdıqlarını qeyd edib.

"Osmanlı dövrü ən gözəl illərimiz idi"

Emşə Aslan Osmanlı dövründə sosial həyatlarının daha gözəl olduğunu vurğulayıb: "Osmanlı dövründə hər şey çox sabit idi. Sosial həyatımız təhlükəsiz və problemsiz keçirdi."

O, Birinci Dünya Müharibəsinin başlandığı illəri yaxşı xatırladığını, yaxın qohumlarının bir çoxunun səfərbərliyə qatıldığını deyib.

Kaça-Kaç üsyanının şahidi olub

İngilislərin İraqı işğalından iki il sonra baş verən və bütün İraqa yayılan Kaça-Kaç üsyanını da xatırlayan Aslan bildirib ki, Telaferdə türkmənlər birləşərək İngilislərə qarşı üsyan qaldırıb. Bu dövrdə böyük çətinliklərlə üzləşdiklərini və ciddi qıtlıq yaşandıqlarını qeyd edən Aslan, həmin illərdə yalnız çörək və xurma şirəsi ilə qidalandıqlarını əlavə edib.