Pulunuza qənaət etmək istəyirsinizsə, BUNLARI EDİN

Maliyyə sabitliyinə gedən yol pullardan ağıllı şəkildə istifadə etməkdən keçir. Əgər pulunuz varsa… Bunun üçün iqtisadi biliklərə malik olmaq və ya xüsusi təhsil almaq mütləq deyil. Yalnız bir neçə sadə qaydaya riayət etməklə lazımsız xərclərdən yayınmaq, vacib ehtiyaclardan imtina etmədən qənaət etmək və yığımlar yaratmaq mümkündür.

BAKU.WS Rusiya mediasına istinadən pulunu necə idarə etməyin qaydalarını təqdim edir.

Özünüzü başqaları ilə müqayisə etməyin

Sosial şəbəkələr dövründə həyatınızı dostlarınızın, keçmiş iş yoldaşlarınızın, sinif yoldaşlarınızın və ya məşhur bloqerlərin həyatı ilə müqayisə etməmək çətindir. Əgər tanışlarınızın böyük alışları, parlaq səyahətləri, bahalı hədiyyələri ilə bağlı şəkillərinə baxarkən bir qədər qısqanclıq hiss edirsinizsə, düşünün ki, həmin alış-veriş kreditlə edilib və onlar hələ də həmin borcu ödəməyə çalışırlar. Daimi müqayisələr nəticəsində impulslara əsaslanan alışlar edirsinizsə, sosial şəbəkələrdən bir müddət imtina etməyi və bu qərarın xərclərinizə necə təsir etdiyini analiz etməyi təklif edirik.

Emosiyaları və xərcləri nəzarətdə saxlayın

Bəzən hisslərimizin təsiri altında düşünmədən xərcləmələr edirik. Həyəcan, narahatlıq və ya darıxmaq bizi bu cür qərarlara sövq edə bilər. Belə xərclər hisslərdən yayınmağa və əhval-ruhiyyəni yaxşılaşdırmağa kömək etsə də, büdcədən artıq xərcləmələr arzuolunmaz nəticələrə gətirə bilər.

Əgər mənfi emosiyalardan sonra alış-veriş etmək istəyirsinizsə, bir az gözləyin və hisslərinizə diqqət yetirin. Özünüzdən soruşun: nə hiss edirsiniz, nəyə görə məyussunuz və ya narahatsınız? Yalnız bir neçə dəqiqə bu hisslər üzərində düşünmək sizi alış-verişdən saxlaya və əslində nə baş verdiyini anlamağa kömək edə bilər. Həmçinin "24 saat qaydası" kimi tanınan üsul da kömək edə bilər. Bahalı bir şey almaq istəyirsinizsə, bir gün gözləyin və həmin əşyanın sizə həqiqətən lazım olub-olmadığını düşünün.

Endirimlərdən, cashback və bonuslardan faydalanın

Endirimlər, kampaniyalar, cashback təklifləri və bonus ballar qənaət etməyə imkan verir. Amma bu imtiyazlara strateji yanaşmaq lazımdır. Yalnız böyük endirim olduğuna görə lazımsız bir əşya almaq marketinq tələsinə düşmək deməkdir. Unutmayın ki, qənaət etmək ən ucuzunu almaq demək deyil. Burada əsas məqsəd qiymət və keyfiyyətin ən yaxşı nisbətini tapmaq və endirimlərdən ağıllı istifadə etməkdir.

"Pis" kreditləri ödəyin və yenilərindən uzaq durun

Kredit kartları üzrə borclar və qısamüddətli kreditlər yüksək faiz ödənişləri tələb edir. Borcları ödəmək üçün çoxlu pul xərcləndiyindən qənaət etmək və ya böyük alışlar etmək çətinləşir. Əgər hazırda açıq kreditləriniz varsa, onların ödənilməsini prioritet edin. Yüksək faizli borcları öncə ödəyin və yeni kreditlər götürməkdən mümkün qədər çəkinin. Kreditlər də bir alətdir və yalnız məqsəd və ödəmə planı olduqda istifadə olunmalıdır.

Büdcə hazırlayın və maliyyənizi izləyin

Büdcə tərtib etmək pulları idarə etməyin ən təsirli üsullarından biridir. Bununla xərcləri izləyə, məlumatları təhlil edə və gələcəkdə daha ağıllı planlar qura bilərsiniz. Hər ayın gəlir və xərclərini qeyd edin. Əsas ehtiyaclarınız üçün kifayət edəcək qədər pulunuz qalacağını və əlavə yığım üçün imkanlar yaradılacağını görəcəksiniz.

Ehtiyat fondu yaradın

Gözlənilməz hallar üçün maliyyə ehtiyatı vacibdir. Bu fond adi həyat xərclərinizi üç-altı ay ərzində qarşılaya bilməlidir.

Düzgün vərdişləri avtomatlaşdırın

Bank tətbiqlərində avtomatik yığım və ödənişlər quraşdırmaqla maliyyə idarəçiliyini asanlaşdırın.

Səhvlərdən çəkinin

Plansız alışlar;

Gəlirdən artıq xərcləmələr;

Yığım fondunun olmaması;

Kredit kartlarından gündəlik xərclər üçün istifadə.

Nəticədə pulları idarə etmək məqsədlərə çatmağa və stressi azaltmağa kömək edir. Maliyyə alətləri sizin üçün işləsin, siz onlardan ağıllı istifadə edin.