Hər kəsin yaşa bağladığı, amma xərçəngə işarə edə bilən simptomlar

İnsanların tez-tez yaşın artması ilə əlaqələndirdiyi bəzi əlamətlər əslində ciddi xəstəliklərin göstəricisi ola bilər.

BAKU.WS xəbər verir ki, onkoloq həkim Vladimir İvaşkov bildirib.

"Bir çoxları belə düşünür: "Nə edəsən, yaş artıq əvvəlki yaş deyil". Amma bəzi "yaşa bağlı" dəyişikliklər əslində müalicə edilə bilən xəstəliklərin əlamətidir", - deyə həkim öz teleqram kanalında yazıb.

Onun sözlərinə görə, gecə 7–8 saat yatmağa baxmayaraq keçməyən daimi yorğunluq qalxanabənzər vəzin fəaliyyəti, dəmir və D vitamini səviyyəsinin yoxlanılması üçün ciddi səbəbdir.

Yaşlı insanlarda yaddaşın bir qədər zəifləməsi normal sayılsa da, əgər şəxs yaxın zamanda baş vermiş söhbətləri unudursa və ya tanış yerlərdə yolunu azırsa, bu, demensiyanın inkişafına işarə edə bilər.

Adi fiziki yüklənmə zamanı yaranan təngnəfəslik ürək çatışmazlığına və ya anemiyaya dəlalət edə bilər. Səbəbsiz çəki itirmə isə diabet, mədə-bağırsaq sistemi problemləri və ya onkoloji xəstəliklərin əlaməti ola bilər.

Səhərlər oyanandan sonra 30 dəqiqədən çox davam edən oynaq ağrıları "duz yığılması" deyil, artrit əlaməti ola bilər.

Gecə iki dəfədən çox sidiyə getmə diabetə, kişilərdə prostat problemlərinə və ya ürək çatışmazlığına işarə edə bilər.

İki həftədən artıq davam edən səs tutulması mütləq LOR həkiminə müraciət etməyi tələb edir. Bu hal qalxanabənzər vəz və ya qırtlaq problemləri ilə bağlı ola bilər.

Tez-tez başgicəllənməsi təzyiq problemləri və ya vestibulyar aparatın pozulması daxil olmaqla bir sıra xəstəliklərin əlaməti ola bilər.

Əgər yazı yazarkən hərflər xırdalaşıb və yazmaq çətinləşibsə, Parkinson xəstəliyinin inkişaf ehtimalı istisna edilməlidir.

Yuxu zamanı güclü tərləmə hormonal pozğunluqlara, infeksiyalara və ya onkoloji xəstəliklərə işarə edə bilər.