Dövlət xidmətlərində yeni dövr: Proaktiv yanaşma və "myGov" portalının imkanları

Artıq dövlət xidmətlərindən istifadə etmək üçün müxtəlif mobil tətbiqlər və saytlar arasında keçid etməyə ehtiyac qalmaya bilər.

Azərbaycan rəqəmsal dövlət modelinə keçidi sürətləndirir. Məqsəd dövlət xidmətlərini vahid platformada birləşdirmək, sənəd dövriyyəsini azaltmaq və vətəndaşlara daha sürətli xidmət göstərməkdir.

Bu istiqamətdə növbəti mühüm addım Rəqəmsal İnkişaf Şurasının ilk iclasında müzakirə olunan yeni hədəflər oldu.

Birinci vitse-prezident Mehriban Əliyevanın sədrliyi ilə keçirilən iclasda dövlət idarəçiliyində rəqəmsallaşmanın genişləndirilməsi, süni intellekt texnologiyalarının tətbiqi, kibertəhlükəsizliyin gücləndirilməsi və dövlət xidmətlərinin vahid platformada birləşdirilməsi əsas prioritetlər kimi müəyyənləşdirildi. İslahatların əsas məqsədi vətəndaşın dövlət xidmətlərinə çıxışını asanlaşdırmaqdır.

Hazırda müxtəlif dövlət qurumlarının xidmətləri mərhələli şəkildə "myGov" platformasında birləşdirilir. Yaxın vaxtlarda vətəndaşların əksər dövlət xidmətlərinə yalnız bir tətbiq vasitəsilə çıxış əldə etməsi nəzərdə tutulur. Rəqəmsal transformasiyanın ən mühüm yeniliklərindən biri proaktiv xidmətlərin genişləndirilməsidir. Bu o deməkdir ki, bəzi hallarda vətəndaşın dövlət qurumuna müraciət etməsinə ehtiyac qalmayacaq. Məsələn, yaşa görə əmək pensiyası dövlət informasiya sistemlərində olan məlumatlar əsasında avtomatik təyin ediləcək.

Eyni yanaşma uşağın anadan olmasına görə birdəfəlik müavinətin ödənilməsində də tətbiq olunacaq. Doğum faktı sistemdə qeydə alınan kimi ödəniş əlavə müraciət olmadan həyata keçiriləcək. Şəxsiyyət vəsiqəsi, xarici pasport və sürücülük vəsiqəsinin müddəti başa çatmazdan əvvəl vətəndaşa avtomatik bildiriş göndərilməsi də planlaşdırılır. Rəqəmsallaşma səhiyyə sistemində də yeni imkanlar yaradacaq.

Hazırlanan Tibbi Rəqəmsal Əkiz Sistemi hər bir vətəndaşın elektron tibbi tarixçəsini, analiz nəticələrini, radioloji müayinələri və digər tibbi məlumatları vahid sistemdə birləşdirəcək. Süni intellekt vasitəsilə işləyəcək bu sistem həkimlərə daha dəqiq diaqnoz qoymağa, xəstəlik risklərini əvvəlcədən müəyyən etməyə və hər bir pasiyent üçün fərdi müalicə planı hazırlamağa kömək edəcək. Vətəndaş isə analiz nəticələrini izləyə, tibbi tarixçəsinə baxa, onlayn həkim qəbuluna yazıla və profilaktik müayinələr barədə avtomatik məlumat ala biləcək.

Mütəxəssislər hesab edirlər ki, həyata keçirilən islahatların əsas məqsədi sadəcə xidmətləri elektronlaşdırmaq deyil. Hədəf dövlət xidmətlərini daha sürətli, şəffaf və əlçatan etmək, vətəndaşın eyni məlumatı müxtəlif qurumlara dəfələrlə təqdim etməsi kimi problemləri aradan qaldırmaq və gələcəkdə bütün dövlət xidmətlərini vahid rəqəmsal ekosistem üzərindən təqdim etməkdir. Bu isə həm vaxta qənaət edəcək, həm də dövlət-vətəndaş münasibətlərində yeni mərhələnin əsasını formalaşdıracaq.