Bu ağız yaxalayıcıları sağlamlıq üçün zərərli ola bilər

Alimlər spirt tərkibli ağız yaxalayıcılarının ağız boşluğundakı faydalı bakteriyalara mənfi təsir edə biləcəyini bildirirlər. Buna görə də, onlardan hər gün istifadə etmək tövsiyə edilmir.

BAKU.WS xarici mətbuata istinadən xəbər verir ki, spirt həm zərərli, həm də faydalı bakteriyaları məhv edir.

"Bir çox ağız yaxalayıcısının tərkibində 5%-dən 27%-ə qədər spirt var. Bu isə Fusobacterium nucleatum və Streptococcus anginosus kimi bakteriyaların artmasına səbəb ola bilər. Qeyd olunan mikroorqanizmlər diş əti xəstəlikləri və bəzi xərçəng növləri ilə əlaqələndirilir", - deyə dietoloq Anjela Koneqni bildirib.

Tədqiqatlar göstərir ki, spirt əsaslı ağız yaxalayıcıları bəzi faydalı bakteriyaları məhv edərək, zərərli bakteriyaların çoxalmasına şərait yaradır. Bu bakteriyalar udulduqda və ya bağırsağa düşdükdə bağırsaq mikroflorasının balansını pozaraq iltihaba səbəb ola bilər.

Araşdırmalara görə, spirt əsaslı ağız yaxalayıcılarından üç ay ərzində hər gün istifadə etdikdə F. nucleatum və S. anginosus bakteriyalarının sayı artır. Bu bakteriyaların mikrobiom balanssızlığı ilə əlaqəli olduğu düşünülür.

Bəzi elmi işlərə əsasən, F. nucleatum-un müəyyən alt növü yoğun bağırsaq xərçəngi ilə əlaqələndirilir. S. anginosus isə ürək-damar xəstəlikləri və xərçəng riskini artırır. Bundan əlavə, bu bakteriyanın yüksək səviyyədə olması koronar ateroskleroz və sistemli iltihabla bağlıdır.

Bütün bunlarla yanaşı, spirt əsaslı ağız yaxalayıcılarının baş və boyun xərçəngi riskini artıra biləcəyi də qeyd edilir.