Alimlərdən maraqlı araşdırma: Sevgi orqanizmi stressdən qoruyur

Sevdiyimiz insanın yanımızda olması orqanizmin stresslə mübarizəsinə kömək edir. Bu qənaətə Qüds İvrit Universitetinin alimləri gəlib.

BAKU.WS xəbər verir ki, araşdırma zamanı iştirakçılar müxtəlif stress sınaqlarına cəlb olunublar.

Onlar karbohidratlı çörək yeyib, 12 dərəcə temperaturda olan otaqda qalıb və qollarına zəif elektrik impulsları alıblar.

Alimlər bu müddətdə qanda şəkərin səviyyəsini, dəri temperaturunu və sinir sisteminin stress reaksiyasını izləyiblər.

Nəticələr göstərib ki, iştirakçıların yanında partnyorları olduqda yeməkdən sonra qanda şəkərin yüksəlməsi 14,55 faiz daha az olub. Soyuq şəraitdə dəri temperaturunun düşməsi 6,76 faiz, elektrik impulslarına stress reaksiyası isə 5,98 faiz zəifləyib.

Tədqiqatçıların fikrincə, sevdiyimiz insanın varlığı orqanizmə daxili tarazlığı daha az fizioloji gərginliklə qorumağa kömək edir.

Araşdırmanın nəticələri "Science Advances" elmi jurnalında dərc olunub.