UEFA reytinqi: Azərbaycan xal hesabını açıb, Ermənistan geriləyib

Azərbaycan UEFA reytinqində 2022/2023 mövsümü üçün xal hesabını açıb.

BAKU.WS "report"a istinadən xəbər verir ki, bu, "Qarabağ" komandasının Polşa "Lex"i ilə UEFA Çempionlar Liqasının I təsnifat mərhələsinin cavab görüşündə əldə etdiyi 5:1 hesablı qələbə sayəsində mümkün olub. Qalibiyyət 4 klubla təmsil olunan ölkənin aktivinə 0,250 xal gətirib.

Lakin Azərbaycan son 5 mövsüm üzrə xal sayını 12,875-ə çatdırmasına rəğmən, 29-cu pillədə qalıb. Səbəb 13,750 xalla 28-ci yerdə gedən Polşanın UEFA Konfrans Liqasındakı təmsilçiləri "Lexiya" və "Poqon"un elə I təsnifat mərhələsindən mübarizəyə başlayaraq, ilk görüşlərini qələbə ilə başa vurmalarıdır. Azərbaycanın bu turnirdəki təmsilçiləri "Neftçi", "Zirə" və "Qəbələ" isə yarışa II təsnifat mərhələsindən start verəcəklər.

Qeyd edək ki, reytinq siyahısında dəyişikliklər aşağı pillələrdə baş verib. Lüksemburq 8,500 xalla 35-ci pilləyə yüksəlibsə, hərəyə 8,375 xalı olan Finlandiya ilə Bosniya və Herseqovina 36-37-ci yerləri bölüşür. Xalını 8,125-ə çatdıran Litva 39-cu mövqeyə irəliləyibsə, 7,875 xalı olan Ermənistan 40-cı yerə geriləyib.

Bundan başqa, Cəbəllütariq (5.541) 48-ci, İslandiya (5.416) 49-cu pilləyə irəliləyibsə, Uels (5.333) 50-ci mövqeyə düşüb.