Tokio-2020 Yay Olimpiya Oyunları başa çatdı - YENİLƏNİB

Tokio-2020 Yay Olimpiya Oyunlarının bağlanış mərasimi keçirilib.

BAKU.WS "Report"a istinadən xəbər verir ki, Yaponiya Milli Stadionundakı tədbir koronavirus pandemiyası səbəbindən azarkeşsiz təşkil olunub.

Əvvəlcə 6 yerli idmançı Yaponiya bayrağını meydanın mərkəzinə gətirib və dövlət himni səsləndirilib

Daha sonra iştirakçı ölkələrin bayraqdarları qarışıq şəkildə arenaya daxil olublar. Açılış mərasimindən fərqli, bu dəfə Azərbaycan bir bayraqdarla təmsil olunub. Dövlət bayrağını olimpiadada gümüş medal qazanmış sərbəst güləşçi Hacı Əliyev daşıyıb. Ardınca isə idmançılar eyni qaydada meydanın mərkəzinə toplaşıblar.

Paraddan sonra lazer işıqları ilə stadionun üzərində Olimpiya halqaları əks olunub. Daha sonra Yaponiyanın sosial həyatını özündə ehtiva edən kompazisiya göstərilib.

Bundan sonra qadınlar və kişilər arasında marafonun qalibəri mükafatlandırlıb. Qadınların mübarizəsində Keniya atleti Peres Cepçirpirə qızıl, onun həmyerlisi Bricit Kosgeyə gümüş, ABŞ təmsilçisi Molli Zaydelə bürünc medal təqdim olunub. Kişilərdə isə fəxri kürsünün ilk pilləsinə keniyalı Eliud Kipçoge qalxıb. İkinci yeri Niderland atleti Abdi Nageye tutub. Bürünc medalı isə Belçikanı təmsil edən Bəşir Abdi qazanıb.

Olimpiadanın rəsmi himni səsləndirildikdən sonra olimpiya bayrağı endirilərək, yarışın növbəti təşkilatçı ölkəsi olan Fransanın nümayəndəsinə təqdim olunub. Ardınca isə Paris-2024 Yay Olimpiya Oyunlarının tanıtım videosu yayımlanıb.

Sonda isə olimpiya məşəli söndürülüb və bununla da yarışa yekun vurulub.

***

16.04

Tokio Milli Stadionunda Olimpiya Oyunlarının bağlanış mərasimi keçirilir. Tədbir açılış mərasimində olduğu kimi tamaşaçılarsız təşkil olunub.

Turnir çərçivəsində bütövlükdə 339 medal dəsti oynanılıb.

Komandaların yarışında 39 qızıl, 41 gümüş və 33 bürünc medal qazanan ABŞ idmançıları qalib gəlib.

İkinci yeri Çin (38-32-18), üçüncü pilləni isə ev sahibi Yaponiya (27-14-17) tutub.

Qeyd edək ki, 2020-ci ildə keçirilməli olan Olimpiya Oyunları pandemiya səbəbindən məhz bu il təşkil edilib.