ÇL: "Araz Naxçıvan" ilk görüşdə rəqibini darmadağın etdi

"Araz-Naxçıvan” komandası futzal üzrə UEFA Çempionlar Liqasının ilkin mərhələsində mübarizəyə start verib.

BAKU.WS "Report"a istinadən xəbər verir ki, son ölkə çempionu F qrupundakı ilk oyununda Cəbəllütariqin "Europa" kollektivi ilə üz-üzə gəlib.

Latviyanın Salaspils şəhərində keçirilən qarşılaşma Azərbaycan təmsilçisinin 9:2 hesablı qələbəsi ilə yekunlaşıb.

"Araz-Naxçıvan”ın heyətində Emanuel Rodriges (3), Amir Şojaei, Xətai Bağırov, Conatas Felipe (2) və İsa Atayev fərqlənib. Bundan əlavə rəqibin oyunçusu Diaz Qalleqo avtoqol müəllifi olub.

Qeyd edək ki, ilkin mərhələnin oyunlarına 8 ölkə ev sahibliyi edir. Avqustun 20-dən 25-dək keçiriləcək matçlar Almaniya, İsveçrə, Şimali Makedoniya, Yunanıstan, Estoniya, Latviya, Albaniya və Monteneqroda təşkil edilir. Reqlamentə uyğun olaraq, 9 komanda - 8 qrup qalibi və ikinci pillədə yer alan iştirakçılardan ən yaxşı göstəriciyə malik bir klub əsas mərhələyə vəsiqə qazanacaq.