Rahid Əmirquliyev: "Qarabağ" ÇL-də qrupa qədər gedə bilər - MÜSAHİBƏ
![Rahid Əmirquliyev: Qarabağ ÇL-də qrupa qədər gedə bilər - MÜSAHİBƏ](https://baku.ws/storage/photos/thumbs/large/1689593685_64b5251401d1064b5251401d11168959310864b5251401d0e64b5251401d0f.webp)
"Qarabağ"ın veteran futbolçusu Rahid Əmirquliyev apasport.az saytına müsahibə verib.
BAKU.WS həmin müsahibəni təqdim edir:
- “Qarabağ” Çempionlar Liqasında “Linkoln”la ilk matçda qələbə qazandı. Amma sanki çətin alındı. Belə olacağını ehtimal edirdiniz?
- Deməzdim ki, çox çətin oldu. Rəqib o gücdə deyildi ki, nəsə problem yaratsın. Sadəcə ilk oyunlar həmişə çətin alınır. Dəfələrlə görmüşük ki, "Qarabağ" startda tam yaxşı çıxış edə bilmir. Amma getdikcə öz formasını yığıb, daha yaxşı oynayırlar. Təbii ki, Qurban Qurbanov bunları bizdən yaxşı bilir. Bu səbəbdən də çətin olacağını bilirdim. Bu, "Linkoln"un güclü olması ilə bağlı deyil. İlk oyun olmasına görədir.
- Bu oyunla “Qarabağ”ı avrokuboklara neçə faiz hazır hesab edirsiniz?
- Faiz etibarı ilə nəsə deyə bilmərəm. Onu Qurban Qurbanov deyə bilər. Amma görünən odur ki, "Qarabağ" hələ tam hazır deyil. Bu da normaldır. Artıracaqlar. Lazım olan pik nöqtəyə çatacaqlar.
- Bakıda “Linkoln” “Qarabağ”a problem yarada bilər? Cavab matçı haqda fikriniz necədir?
- Məncə, evdə də qalib gələcəklər. Düşünmürəm ki, "Linkoln" "Qarabağ"a problem yarada bilsin.
- “Qarabağ” üçün avrokubokların ilk oyunu hər zaman çətin alınır. Ötən mövsüm “Lex”lə müqayisədə “Linkoln"a qarşı daha yaxşı oynadı, ya ötən mövsümün ilk matçını daha yaxşı keçirmişdi?
- "Lex" - "Qarabağ" oyunu ilə bu matçı müqayisə etmək doğru deyil. Polşalılar daha güclü, daha təcrübəli idi. Hər iki görüş də ağır keçdi. Amma ustalıq səviyyəsi baxımından "Linkoln" matçı daha rahat alındı.
- Nəriman Axundzadə barədə fikriniz necədir? İki qol epizodu var idi. Səncə, o, əsas heyətdə oynamağa davam edə biləcək?
- Çempionlar Liqasında ilk oyunu olsa da, Nəriman yaxşı çıxış etdi. Cavan, perspektivli oyunçudur. Belə davam etsə, "Qarabağ"ın əsas heyət futbolçusu ola bilər. Düzdür, onların heyəti genişdir, güclü oyunçuları çoxdur. Amma Nəriman göstərdi ki, çıxıb hər matçda oynayıb, "Qarabağ"a kömək edə bilər. Sevindirici haldır ki, belə cavanlarımız var, avrokuboklara çıxırlar və “mondraj”a düşmürlər. Özlərini yaxşı tərəfdən göstərə bilirlər.
- “Qarabağ”ın hazırkı yığılan heyəti komandanı ÇL-də qruplara qədər aparmasına kömək ola biləcək?
- Güclü və geniş heyətləri var. Patrik Andrade də qayıtdı. Çox güclü və yüksək səviyyəli üstün futbolçudur. Ola bilər ki, transferlər yenə olsun. Amma bu heyətlə də, "Qarabağ" ÇL-də qrupa qədər gedə bilər.
Oxşar xəbərlər
Maksim Medvedev: “Bəzən millinin oyununa baxanda televizoru beş dəqiqəlik söndürürəm” - MÜSAHİBƏ
“Bəzən “Qarabağ” da uduzur, amma insanlar alqışlayırlar. Çünki görürlər ki, futbol oynayırıq. Biri də var ki, meydana çıxırsan, amma futbol göstərmirsən. Mən də...